టైగర్స్ కోసం తాప్సీ వస్తోంది

టాలీవుడ్ లో కమర్షియల్ హిట్ కోసం అన్ని రకాల ప్రయత్నాలు చేసి.. విసిగి వేసారి బాలీవుడ్ కు మకాం మార్చేసి అక్కడ తన అదృష్టాన్ని పరీక్షించుకుంటోంది సొట్ట బుగ్గల సుందరి తాప్సీ పన్ను. పింక్ సినిమాతో బాలీవుడ్ లో కోరుకున్న గుర్తింపు వచ్చిందే కానీ అవకాశాలు ఆ స్థాయిలో రాకపోవడంతో ఈ మధ్య గ్లామర్ డోస్ బాగా పెంచింది. తాజాగా పులులను కాపాడదామంటూ పిలుపునిస్తూ టీవీ లో కనిపిస్తోంది.

యానిమల్ ప్లానెట్ ఛానల్ పులుల సంరక్షణ కోసం అందరూ గొంతు కలపాలని కోరుతూ ‘వేర్ టైగర్ రూల్స్’ పేరిట ఓ ప్రోగ్రాం చేస్తోంది. ఈ ప్రోగ్రాం ద్వారా పులుల మనుగడ ప్రమాదంలో పడిన తీరుపై దేశమంతటా చైతన్యం తీసుకురావాలన్నది ఆ ఛానల్ లక్ష్యం. ఈ క్యాంపెయిన్ కు తాప్సీ సపోర్ట్ చేస్తోంది. ‘‘నాది సింహరాశి. చిన్నప్పటి నుంచి జంతువులంటే ఆసక్తి ఉండేది. పులుల్లో కనిపించే గాంభీర్యం నాకెంతో నచ్చుతుంది. అందుకే వాటి సంరక్షణకు క్యాంపెయిన్ చేసే అవకాశం రాగానే ఎగిరి గంతేసి ఒప్పుకున్నా. ఇందుకోసం చేసిన షూట్ వల్ల జూలో బోనుల మధ్య ఉన్న పులులను కాకుండా అడవిలో స్వేచ్ఛగా సంచరించే పులులను చూడగలిగాను. అదో మరిచిపోలేని అనుభవం’’ అంటోంది ఈ సుందరాంగి.

చాలా రోజుల తర్వాత ఆనందోబ్రహ్మ సినిమాతో తెలుగు తెరపై కనిపించిన తాప్సీ బాగానే నవ్వులు పూయించింది. వరుణ్ ధావన్ తో కలిసి నటించిన లేటెస్ట్ కామెడీ ఎంటర్ టెయినర్ జుడ్వా-2 తనకు బాలీవుడ్ లో మరిన్ని అవకాశాలు తెచ్చిపెడుతుందని తాప్సీ ఆశపడుతోంది. జుడ్వా సినిమా తెలుగులో నాగార్జున హీరోగా నటించిన హలో బ్రదర్ కు రీమేక్. ఆ సినిమాకు కొనసాగింపుగా జుడ్వా-2 వస్తోంది.