ఆ హీరోయిన్ ని వదలని తాప్సీ!

కంగనా రనౌత్ ను వదలడం లేదు తాప్సీ. అవకాశం దొరికినప్పుడల్లా ఆమెపై తాప్సీ విమర్శలు చేస్తూనే ఉంది. కంగనా సోదరి రంగోలీ బాలీవుడ్ జనాలను ఇష్టానుసారం విమర్శిస్తూ వస్తున్న సంగతి తెలిసిందే. తన సోదరి స్టార్ హీరోయిన్ అయ్యిందని రంగోలి మిగతా వాళ్లను విమర్శిస్తోంది. లోలోన గొడవలు ఏమున్నాయో కానీ..కంగనా ఆమె సోదరి అందరి మీదా విరుచుకుపడుతూ ఉన్నారు.

అలా వారు తాప్సీని కూడా విమర్శించారు. తాప్సీ తన సోదరిని అనుకరిస్తోందని అంటూ రంగోలీ విమర్శలు చేసింది. కంగనాకు తాప్సీ ఒక చౌకబారు నకలు అని రంగోలీ వ్యాఖ్యానించింది. ఇప్పటికే ఆ విషయంలో తాప్సీ స్పందించింది. రంగోలీ వ్యాఖ్యలను స్వాగతిస్తూనే తాప్సీ సెటైర్లు వేసింది. తను చౌక అనే విషయాన్ని ఒప్పుకుంటూ, తను కంగనా స్థాయి రెమ్యూనరేషన్ తీసుకోనంటూ తాప్సీ వ్యంగ్యంగా స్పందించింది.

ఆ సంగతలా ఉంటే.. తాజాగా మరోసారి తాప్సీ స్పందించింది. కంగనాను ఉద్దేశించి తాప్సీ పంచ్ లు వేసింది. తమ తాజా సినిమా 'మిషన్ మంగళ్' ను కంగనా ఎక్కడా ప్రస్తావించకపోవడాన్ని తాప్సీ గుర్తు చేసింది. 'ఇండస్ట్రీలోని హీరోయిన్లకు కంగనా ఒక మాట చెబుతూ ఉంటారు. మహిళలు ఒకరికి ఒకరు సహకరించుకోవాలని, హీరోయిన్లు ఒకరి సినిమాకు మకొరు సహకరించుకోవాలని కంగనా చెబుతుంటారు. మరి 'మిషన్ మంగళ్' లో ఐదు మంది హీరోయిన్లం నటించాం. అది మహిళా ప్రధానమైన సినిమా. ఆ సినిమాను కంగనా ఎక్కడా ప్రమోట్ చేయలేదు. తను ప్రధాన పాత్రలో నటించే సినిమాలను అందరూ ప్రమోట్ చేయాలనే కంగనా - ఇతర మహిళా ప్రధానమైన సినిమాలను ఎందుకు ప్రమోట్ చేయడం లేదు..' అంటూ తాప్సీ చురకలు అంటించింది.