పవన్ ను డైరెక్ట్ చేసే ఛాన్స్ అందుకున్న టాలెంటెడ్ డైరెక్టర్..?

పవన్ కళ్యాణ్ ప్రస్తుతం పలు క్రేజీ ప్రాజెక్ట్స్ తో బిజీగా ఉన్నారు. ఎప్పుడు కంప్లీట్ అవుతాయో తెలియనప్పటికీ వరుసగా సరికొత్త సినిమాలను లైన్ లో పెడుతున్నారు. దీని కోసం సన్నిహితుడు, అగ్ర దర్శకుడు త్రివిక్రమ్ శ్రీనివాస్ సహాయం తీసుకుంటున్నారని టాక్.

'పింక్' రీమేక్ గా పవన్ కళ్యాణ్ కంబ్యాక్ మూవీ 'వకీల్ సాబ్' ను సెట్ చేయడంలో.. దర్శకుడు వేణు శ్రీరామ్ చేతిలో ఈ ప్రాజెక్ట్ పెట్టడం వెనుక త్రివిక్రమ్ పాత్ర కూడా ఉంది. మలయాళ సినిమా 'అయ్యప్పనుమ్ కొశీయుమ్' రీమేక్ ని పవన్ దగ్గరకు తీసుకెళ్లింది కూడా ఆయనే.

అంతేకాదు దీనికి స్క్రీన్ ప్లే - మాటలు అందించిన 'భీమ్లా నాయక్' సినిమా బ్లాక్ బస్టర్ లో భాగమయ్యారు త్రివిక్రమ్. ఈ క్రమంలో ఇప్పుడు పవన్ కోసం మరో కొత్త ప్రాజెక్ట్ ని సెట్ చేసే పనిలో ఉన్నాడని.. దీనికి టాలెంటెడ్ డైరెక్టర్ సుధీర్ వర్మ దర్శకత్వం వహిస్తారని టాక్ వినిపిస్తోంది.

ఇటీవలే 'శాకినీ డాకినీ' అనే చిత్రాన్ని పూర్తి చేసిన సుధీర్ వర్మ.. ప్రస్తుతం రవితేజ తో 'రావణాసుర' అనే మూవీ తెరకెక్కిస్తున్నారు. ఈ క్రమంలో పవన్ కళ్యాణ్ తో సినిమా చేసే అవకాశం దక్కించుకున్నారని అంటున్నారు. ఈ చిత్రానికి త్రివిక్రమ్ శ్రీనివాస్ కథ - స్క్రీన్‌ ప్లే - డైలాగ్‌ లు అందించనున్నారట.

సితార ఎంటర్‌టైన్‌మెంట్స్‌ మరియు ఫార్చ్యూన్‌ ఫోర్‌ సినిమాస్‌ బ్యానర్స్ పై ఈ ప్రాజెక్ట్ రూపొందనుందట. ఈ ఆసక్తికరమైన ప్రాజెక్ట్‌ షూటింగ్ వచ్చే ఏడాది ప్రారంభం కానుందని టాక్ నడుస్తోంది. ఇందులో నిజమెంతో తెలియాలంటే అధికారిక ప్రకటన వచ్చే వరకు ఆగాల్సిందే.

పవన్ ప్రస్తుతం క్రిష్ జాగర్లమూడి దర్శకత్వంలో 'హరి హర వీర మల్లు' అనే పాన్ ఇండియా మూవీ చేస్తున్నారు. అలానే హరీష్ శంకర్ దర్శకత్వంలో 'భవదీయుడు భగత్ సింగ్‌' సినిమా రెగ్యులర్ షూటింగ్ ప్రారంభించాల్సి ఉంది. ఇదే క్రమంలో సురేందర్ రెడ్డి తో ఓ ప్రాజెక్ట్ చేయనున్నాడు.

ఇక పవన్ కళ్యాణ్ - వైష్ణవ్ తేజ్ ప్రధాన పాత్రల్లో 'వినోదయ సీతమ్' తెలుగు రీమేక్ తెరకెక్కనుందని గత కొన్ని రోజులుగా వార్తలు వస్తున్నాయి. మరోవైపు త్రివిక్రమ్ శ్రీనివాస్ ఇప్పుడు సూపర్ స్టార్ మహేష్ బాబుతో సినిమాని సెట్స్ మీదకు తీసుకెళ్లడానికి రెడీ అవుతున్నారు.