కాజల్ పాత్ర మిస్సయ్యానంటున్న తమ్మూ

నీ డ్రీమ్ రోల్ ఏది అని ఓ సౌత్ హీరోయిన్ని అడిగితే.. ఏ హాలీవుడ్ సినిమానో, బాలీవుడ్ సినిమాను గుర్తు తెచ్చుకుని అందులోని పాత్ర గురించి చెప్పడం కామన్. లేదంటే తనకు డ్రీమ్ రోల్స్ అంటూ ఏమీ లేవని చెప్పొచ్చు. ఐతే ఒక అగ్ర హీరోయిన్.. తనకు పోటీగా ఉన్న హీరోయిన్ పాత్రను ప్రస్తావించడం.. అది నేను చేస్తే బాగుండేదని అనడం అరుదుగా జరుగుతుంది. అసలేమాత్రం ఇగో లేనట్లు కనిపించే తమన్నా ఈ తరహా జవాబే ఇచ్చింది.

తన కంటెంపరరీ హీరోయిన్ కాజల్ అగర్వాల్ పోషించిన పాత్రపై తమన్నా ముచ్చటపడింది. ‘మిస్టర్ పర్ ఫెక్ట్’ సినిమాలో కాజల్ చేసిన క్యారెక్టర్ తనకు ఎంతో ఇష్టమట. నిజానికి ఆ పాత్రకు ముందు తమ్మూనే అడిగారట. కానీ కొన్ని కారణాల వల్ల అది వర్కవుట్ కాలేదట. ఐతే తనకు మాత్రం ఆ పాత్ర చాలా ఇష్టమని.. అది చేసి ఉంటే బాగుండేదని అంటోంది.

మరోవైపు ‘ఊపిరి’ సినిమాలో శ్రుతి హాసన్ చేయాల్సిన పాత్రను తాను చేయడం గురించి ప్రస్తావిస్తూ.. ‘‘శ్రుతి ఏ కారణాలతో ఆ సినిమా నుంచి బయటికి వెళ్లిందో నాకు తెలియదు. కానీ నాకు మాత్రం ఈ కథ, నా పాత్ర బాగా నచ్చాయి. ఊపిరి హానెస్ట్ మూవీ. కథ వినగానే ఒప్పేసుకున్నా’’ అని చెప్పింది. బాహుబలి-2 షూటింగ్ లో ఎప్పుడు పాల్గొంటావు అని అడిగితే.. ‘‘ఇందులో నా పాత్ర పెద్దగా ఉండదు. ఐతే ప్రస్తుతానికి ఆ సినిమా కోసం నా డేట్లు ఏమీ అడగలేదు. ఐతే రాజమౌళి ఎప్పుడు పిలిస్తే అప్పుడెళ్లి సెట్లో వాలిపోతా. ఇండియన్ సినిమా ముఖచిత్రాన్ని మరోసారి బాహుబలి-2 మార్చేస్తుంది’’ అని తమ్మూ చెప్పింది.