తమన్నా కలలు కంటున్న పాట ఫినిష్

అభినేత్రి.. తన కెరీర్లో చాలా చాలా స్పెషల్ సినిమా అంటోంది మిల్కీ బ్యూటీ తమన్నా. కెరీర్లో తొలిసారి తమ్మూ ద్విపాత్రాభినయం చేయడమే కాదు.. కాంట్రాస్టింగ్ గా ఉండే రెండు క్యారెక్టర్లు చేసింది ఇందులో. అందులోనూ అమాయక పల్లెటూరి అమ్మాయిలా సంప్రదాయబద్ధంగా ఉన్న పాత్ర గెటప్ భలే ఆసక్తిని రేకెత్తిస్తోంది. తమన్నా చేసిన తొలి హార్రర్ కామెడీ జానర్ మూవీ కూడా ఇదే. పైగా ప్రభుదేవాకు జంటగా నటించింది ఇందులో.

ప్రభుదేవాతో కలిసి తమన్నా ఇందులో అదిరిపోయే స్టెప్పులేయబోతున్న సంగతి.. ప్రభుదేవా షేర్ చేసిన రిహార్సల్స్ వీడియో చూస్తేనే అర్థమైంది. ఈ డ్యాన్సింగ్ నంబర్ కోసం చాలా రోజుల పాటు సాధన చేసింది తమ్మూ. లేటెస్టుగా ఆ పాట చిత్రీకరణ కూడా అయిపోయిందట. ఇది తన లైఫ్ లోనే మెమొరబుల్ సాంగ్ అంటోంది తమ్మూ. ‘అభినేత్రి’ స్క్రిప్టు విన్న రోజు నుంచి ఈ పాట షూటింగ్ ఎప్పుడెప్పుడు చేస్తామా అని ఆత్రంగా ఎదురు చూశానని.. ఇది ఒకరకంగా తన డ్రీమ్ సాంగ్ అని తమ్మూ చెప్పింది. తన కోసం ఈ పాటకు కొరియోగ్రఫీ చేసిన ప్రభుదేవాకు థ్యాంక్స్ చెప్పింది తమ్మూ.

ప్రభుదేవా-తమన్నా-సోనూ సూద్ కీలక పాత్రలు పోషిస్తున్న ‘అభినేత్రి’కి ఎ.ఎల్.విజయ్ దర్శకుడు. తెలుగులో కోన వెంకట్ నిర్మిస్తున్నాడు. తమిళంలో ప్రభుదేవానే నిర్మాత. ఆగస్టు 15న శ్రీదేవి ముఖ్య అతిథిగా ఆడియో విడుదలవుతుంది. సెప్టెంబర్లో సినిమా ప్రేక్షకుల ముందుకొస్తుంది. తమిళంలో ఈ సినిమాకు ‘దేవి’ అనే టైటిల్ ఖరారు చేశారు.