విలన్ వీపు మీద అతగాడితో మిల్కీ

హీరోయిన్లను భయపెట్టేసే పాత్రలతో పాటు.. సెంటిమెంట్ కురిపించే సినిమాల్లో కూడా నటించాడు సోనూ సూద్. అయినా సరే అరుంధతి దెబ్బకి ఇతగాడికి పెద్ద విలన్ అనే స్టాంప్ స్ట్రాంగ్ గానే పడిపోయింది. ఇప్పుడీ విలన్ వీపు మీద హీరోయిన్ తమన్నా ఎంచక్కూ కూర్చుుందంటే అమ్మడి ధైర్యం పొగడాలేమో కదూ.

నిజంగా విలన్ అయితే.. ఇంత ధీమాగా కూర్చుంటుందా ఏంటి? ఇదంతా 2 ఇన్ 1 సినిమా ప్రచారంలో భాగం. అదేనండీ.. తెలుగులో అభినేత్రి అంటూ తమన్నా త్వరలో వచ్చేస్తోంది కదా. ఆ మూవీ హిందీ వెర్షన్ కి ప్రొడ్యూసర్ ఈ సోనూసూద్. సినిమాలో మిల్కీ బ్యూటీకి భర్తగా ప్రభుదేవా నటించగా.. ఓ హీరో పాత్రలో సోనూసూద్ యాక్ట్ చేశాడు. ఇప్పుడీ అభినేత్రి రిలీజ్ కి రెడీ అవడంతో.. పబ్లిసిటీ కార్యక్రమాలు మొదలుపెట్టేసింది యూనిట్.

అందులో భాగంగానే ఇలా తన వీపుపై తమన్నాను.. ప్రభుదేవాను కూచోబెట్టుకుని.. పుషప్స్ చేస్తూ కూడా నవ్వుతూ పోజిచ్చాడు సోనుసూద్. ఈ ఏడాది ఈ విలన్ తండ్రి శక్తి సాగర్ సూద్ మరణించగా.. ఆయన పేరుపై శక్తిసాగర్ ప్రొడక్షన్స్ అనే బ్యానర్ స్టార్ట్ చేసిన సోనూ సూద్.. 'నా సొంత నిర్మాణ సంస్థ ద్వారా అక్టోబర్ 7న విడుదలవుతున్న మొదటి చిత్రం విడుదలకు సర్వం సిద్ధం. మీ ఆశీర్వాదాలు కావాలి' అంటూ ఈ ఫోటోను పోస్ట్ చేసి ఆశీర్వాదాలు అడిగాడు.