మంచు లక్ష్మి మాకందరికీ స్ఫూర్తి- తమన్నా

స్టార్‌ హీరోయిన్‌ తమన్నా తెలుగులో చేసిన తొలి సినిమా ఏదో గుర్తుందా.. శ్రీ. మంచు మనోజ్‌ సరసన హీరోయిన్‌గా ఎంట్రీ ఇచ్చిన తమ్మూకు అప్పటికి కేవలం 15 ఏళ్లే. తొలి సినిమా చేదు ఫలితాన్నివ్వడంతో తమిళంలోకి వెళ్లిపోయిన తమ్మూ.. ఆ తర్వాత హ్యాపీడేస్‌తో మళ్లీ టాలీవుడ్‌లోకి రీ ఎంట్రీ ఇచ్చి ఇక్కడ స్టార్‌ హీరోయిన్‌గా ఎదిగింది. ఐతే ఇప్పుడీ స్థాయిలో ఉన్నానంటే అందుక్కారణం మంచు ఫ్యామిలీయే అని.. తన కెరీర్‌ సక్సెస్‌ క్రెడిట్‌ మొత్తం వాళ్లదేనని అంటూ తన కృతజ్ఞతను చాటుకుంది మిల్కీ బ్యూటీ. దొంగాట ఆడియో ఫంక్షన్‌లో మంచు ఫ్యామిలీపై, మంచు లక్ష్మిపై తమ్మూ ప్రశంసల జల్లు కురిపించింది.

''నేనీ రోజిలా ఉన్నానంటే అందుకు మంచు ఫ్యామిలీనే కారణం. మోహన్‌బాబు గారికి గుండెల్లో ఎప్పుడో ప్రత్యేకమైన స్థానం ఉంటుంది. ఆయన వల్లే నేనిలా మీ ముందున్నా. మంచు లక్ష్మితో శ్రీ సినిమా చేసేప్పటి నుంచి పరిచయం. నాకెంతో సాయం చేసిందామె. లక్ష్మి నంబర్‌ నేనెప్పుడూ మొబైల్‌లో సేవ్‌ చేసుకోను. తన మాట వినగానే గుర్తుపట్టేస్తా. అంత యునీక్‌ వాయిస్‌. ఆమె నా లాంటి అమ్మాయిలందరికీ స్ఫూర్తి. ఆమె నటిస్తుంది. సినిమాలు నిర్మిస్తుంది. పాడుతుంది. ఇంకా చాలా చేస్తుంది. యాందిరో పాటను అద్భుతంగా పాడింది. నాకా పాట విపరీతంగా నచ్చేసింది. దొంగాట సినిమా సూపర్‌ హిట్టవ్వాలని కోరుకుంటున్నా'' అని చెప్పింది తమ్మూ.