తమన్నా రోల్ పై 'మాస్ట్రో' మేకర్స్ పెద్దగా ఫోకస్ చేయడం లేదా..?

బాలీవుడ్ లో బ్లాక్ బస్టర్ హిట్ అయిన 'అంధాదున్' చిత్రాన్ని తెలుగు తమిళ భాషల్లో రీమేక్ చేస్తున్న సంగతి తెలిసిందే. తెలుగులో యూత్ స్టార్ నితిన్ హీరోగా ''మాస్ట్రో'' పేరుతో ఈ సినిమా తెరకెక్కుతోంది. ఈ బ్లాక్ కామెడీ క్రైమ్ థ్రిల్లర్ కి మేర్లపాక గాంధీ దర్శకత్వం వహిస్తున్నారు. ఇస్మార్ట్ బ్యూటీ నభా నటేష్ హీరోయిన్ గా నటిస్తుండగా.. మిల్కీ బ్యూటీ తమన్నా కీలక పాత్ర పోషిస్తోంది. హిందీలో టబు నటించిన బోల్డ్ అండ్ నెగెటివ్ షేడ్స్ ఉన్న పాత్రలో తమన్నా కనిపించనుంది.

'అంధాదున్' తెలుగు రీమేక్ లో ఎలాంటి మార్పులు చేయకపోతే.. 'మాస్ట్రో' చిత్రంలో తమన్నా ది కీ రోల్ అనే చెప్పాలి. హీరోయిన్ కంటే ఎక్కువ ప్రాధాన్యత ఉంటుంది. ఆమె పాత్ర చుట్టూనే ఈ సినిమా కథ అంతా నడుస్తుంది. అయితే ఎందుకో 'మాస్ట్రో' మూవీలో త‌మ‌న్నా రోల్ పై మేక‌ర్స్ పెద్దగా ఫోక‌స్ చేయ‌డం లేదనే టాక్ వినిపిస్తోంది.

'మాస్ట్రో' చిత్రంలో స్టార్ హీరోయిన్ తమన్నా నటిస్తున్నారనే అనౌన్స్ మెంట్ అయితే ఇచ్చారు కానీ.. ఆమె రోల్ గురించి ప్రత్యేకంగా ప్రమోషనల్ కంటెంట్ ఏమీ వదలలేదు. ఇప్పటి వరకు ప్రచార చిత్రాల ద్వారా నితిన్ ఇందులో అంధుడిగా కనిపించనున్నారని చెబుతూ వచ్చిన చిత్ర యూనిట్.. టీజర్ లో కూడా తమన్నా రోల్ ని ప్రస్తావించలేదు. అయితే ఇప్పుడు తాజాగా వ‌దిలిన 'వెన్నెల్లో ఆడపిల్ల' పాట‌ చివర్లో సింపుల్ గా మిల్కీ బ్యూటీని చూపించేశారు.

ఎన్నో ఏళ్లుగా ఇండస్ట్రీలో స్టార్ హీరోయిన్ గా కొనసాగుతున్న త‌మ‌న్నా కు.. నితిన్ కంటే కాస్త ఎక్కువ క్రేజ్ ఉందని అనుకోవచ్చు. అలాంటప్పుడు మూవీని హీరోతో పాటుగా ఆమె పేరుతో కూడా ప్రమోట్ చేసుకోవచ్చు. కానీ 'మాస్ట్రో' మేకర్స్ మాత్రం ఆ విధంగా ఆలోచించడం లేదని అనిపిస్తోంది. ఈ చిత్రాన్ని ఓటీటీలో రిలీజ్ చేస్తున్నారనే ప్రచారం జరుగుతోంది. మరి అందుకే తమన్నా పై చిత్ర బృందం పెద్దగా దృష్టి పెట్టడం లేదేమో అని టాక్ వినిపిస్తోంది.

ఇకపోతే 'మాస్ట్రో' చిత్రంలో త‌మ‌న్నా భర్తగా సీనియ‌ర్ న‌రేశ్ నటిస్తుండగా.. ప్రియుడిగా జిషు సేన్ గుప్తా కనిపించనున్నారు. రాజ్ కుమార్ ఆకెళ్ల సమర్పణలో శ్రేష్ఠ మూవీస్ బ్యానర్ పై ఎన్.సుధాకర్ రెడ్డి - నికిత రెడ్డి ఈ చిత్రాన్ని నిర్మిస్తున్నారు. త్వరలోనే ఈ సినిమా విడుదల తేదీని మేకర్స్ ప్రకటించనున్నారు.