తమన్నా-సందీప్.. ఇంత సీక్రెట్ ఎందుకు?

ఈ రోజుల్లో హడావుడి లేకుండా సినిమాలను చేయడం కొంచెం కష్టమే. ఎంత జాగ్రత్తగా చేసినా సినిమా గురించి ఎదో ఒక విషయం లీక్ అవుతుంది. అయితే చిత్ర యూనిట్ కూడా సినిమా గురించి నలుగురికి తెలిస్తేనే కొంచెం ప్రమోషన్స్ పెరిగే అవకాశం ఉంటుందని ఎదో ఒక విషయాన్ని చెబుతుంటుంది. ఎంత చిన్న ప్రొడక్షన్ వారైనా కనీసం టైటిల్ లోగో అయినా రిలీజ్ చేస్తారు. లేదా సోషల్ మీడియాలో పోస్టర్స్ ని రిలీజ్ చేస్తుంటారు.

కానీ విచిత్రం ఏమిటోగాని కొంచెం పేరున్న వారు మాత్రం సినిమా గురించి ఎలాంటి విషయాన్నీ చెప్పకుండా సైలెంట్ గా సినిమాను పూర్తి చేస్తున్నారు. వారు ఎవరో కాదు సందీప్ కిషన్ అండ్ తమన్నా ఈ ఇద్దరికి గత కొన్నేళ్లుగా సరైన సక్సెస్లు లేవు. దీంతో ఎలాగైనా కొంచెం గట్టిగా హిట్ కొట్టాలని ప్లాన్ చేస్తున్నారా అని అనిపిస్తోంది. ఇక సినిమాకు నిర్మాత ఎవరో తెలిస్తే షాక్ అవుతారు. నిత్యం టాలీవుడ్ కి దగ్గర ఉంటూ హీరోగా గుర్తింపు తెచ్చుకోవాలని తపన పడే సచిన్ జోషి ఉన్నాడు చూశారూ.. అతనే!!

కునాల్ కోహ్లీ దర్శకత్వంలో ఈ ప్రాజెక్టు నడుస్తుండడం మరొక షాకింగ్ న్యూస్. నలుగురికి తెలిసిన ఈ నలుగురు ఇంత సీక్రెట్ గా సినిమాను ఎలా చేస్తున్నారో ఎవ్వరికి అర్ధం కావడం లేదు. ఎప్పుడో స్టార్ట్ చేసిన ఆ ప్రాజెక్ట్ ప్రస్తుతం చివరిదశలో ఉంది. మరి కొన్ని రోజుల్లో పోస్ట్ ప్రొడక్షన్ పనులు కూడా అయిపొవస్తాయి. ఇక ఫిబ్రవరిలో సినిమాను రిలీజ్ చేసే అవకాశాలు కూడా కనిపిస్తున్నాయి. మరి ఈ స్పెషల్ సినిమా ఎంతవరకు ఆకట్టుకుంటుందో చూడాలి.