వేధింపుల కేసు నిందితుడితో తమన్నా మలయాళ డెబ్యూ..!

మిల్కీ బ్యూటీ తమన్నా గత కొన్నేళ్లుగా స్టార్ హీరోయిన్ గా రాణిస్తోంది. యంగ్ బ్యూటీస్ తో సమానంగా వరుస అవకాశాలు అందుకుంటూ ఇండస్ట్రీలో తన స్థానాన్ని సుస్థిరం చేసుకుంది. ప్రస్తుతం తెలుగు తమిళ కన్నడ హిందీ చిత్రాల్లో నటిస్తున్న తమన్నా.. ఇప్పుడు మలయాళ చిత్ర పరిశ్రమలో అడుగుపెడుతోంది.

తమన్నా మాలీవుడ్ లో అరంగేట్రం చేస్తున్నందుకు హ్యాపీగా ఉన్నప్పటికీ.. దీని కోసం ఆమె ఎంచుకున్న హీరోని చూసి అభిమానులు షాక్ అవుతున్నారు. మలయాళ నటుడు దిలీప్‌ సరసన తమన్నా హీరోయిన్ గా నటించాడని రెడీ అయింది.

అరుణ్ గోపీ దర్శకత్వం వహిస్తున్న ఈ చిత్రాన్ని #D147 అనే వర్కింగ్ టైటిల్‌ తో గురువారం పూజా కార్యక్రమాలజో లాంఛనంగా ప్రారంభించారు. కేరళలో జరిగిన ఈ వేడుకకు దిలీప్ తో కలిసి తమన్నా హాజరైంది. దీనికి సంబంధించిన ఫోటోలు సోషల్ మీడియాలో చక్కర్లు కొడుతున్నాయి.

2017లో హీరోయిన్ భావన ​​మీనన్‌ ని అపహరించి వేధింపులకు గురిచేసిన కేసులో నిందితుల్లో దిలీప్ ఒకడన్న విషయం తెలిసిందే. ఈ కేసులో అతను దర్యాప్తు అధికారులను హత్య చేసేందుకు కుట్ర పన్నాడనే ఆరోపణలు కూడా ఉన్నాయి. ప్రస్తుతం ఈ కేసు కోర్టులో నడుస్తుండగా.. దిలీప్ బెయిల్‌ పై బయట ఉన్నాడు.

ఈ కేసులో అన్ని చిత్ర పరిశ్రమలకు చెందిన పలువురు నటీనటులు భావన కు మద్దతు తెలిపారు. దిలీప్‌ ఈ కేసులో అరెస్టు కాబడి ప్రేక్షకులలో తన ఫేమ్ ని పోగొట్టుకున్నాడు. ఆయన నటించిన చివరి చిత్రం ‘రామలీల’ ను బాయ్ కాట్ చేయాలని సోషల్ మీడియాలో ట్రెండ్ చేశారు.

అయితే వేధింపుల కేసులో నిందితుడైన దిలీప్‌ సినిమాతో ఇప్పుడు తమన్నా మలయాళంలో అరంగేట్రం చేస్తుండటం ఆమె అభిమానులను ఆందోళనకు గురి చేస్తోందని టాక్ నడుస్తోంది. డబ్బే ప్రధానంగా తమన్నా ఈ ప్రాజెక్ట్ కు సైన్ చేసిందని కొందరు నెటిజన్లు ట్రోల్ చేస్తున్నారు. మరికొందరు మాత్రం నటిగా ఆమె తన పని చేసుకుంటే తప్పేంటని సపోర్ట్ గా నిలుస్తున్నారు.

ఇకపోతే తమన్నా ప్రస్తుతం మధుర్ భండార్కర్ దర్శకత్వంలో 'బబ్లీ బౌన్సర్' అనే హిందీ సినిమాలో నటిస్తోంది. తెలుగులో మెగాస్టార్ చిరంజీవి సరసన 'భోళా శంకర్' మూవీ చేస్తోంది. సత్యదేవ్ తో కలిసి ఆమె నటించిన 'గుర్తుందా శీతాకాలం' సినిమా సెప్టెంబర్ 23న విడుదల కాబోతోంది.

అలానే నవాజుద్దీన్ సిద్ధికీతో కలిసి తమన్నా భాటియా నటించిన 'భోలే చుడియా' చిత్రం రిలీజ్ కు రెడీ అవుతోంది. రితేష్ దేశ్ ముఖ్ తో చేసిన 'ప్లాన్ ఎ ప్లాన్ బి' మూవీ నెట్ ఫ్లిక్స్ లో విడుదల కాబోతోంది. ఇదే క్రమంలో మిల్కీ బ్యూటీ 'జీ కర్దా' అనే వెబ్ సిరీస్ తో అలరించనుందని సమాచారం.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.