తెలుగు బాస్ దారిలోనే తమిళ బాస్ కూడా!

హిందీలో సుదీర్ఘ కాలంగా బిగ్ బాస్ షో ప్రేక్షకులను అలరిస్తూ వస్తోంది. ఉత్తరాది ప్రేక్షకులు బిగ్‌ బాస్ ను ఓన్ చేసుకున్నారు. సౌత్‌ ఆడియన్స్ ముందుకు బిగ్‌ బాస్ ను తీసుకు వచ్చేందుకు కాస్త ఆలస్యం అయ్యింది. ఆలస్యం అయినా కూడా సౌత్‌ బిగ్ బాస్ కూడా ఆకట్టుకుంటుంది. తెలుగు మరియు తమిళంలో దాదాపుగా ఒకే సారి ప్రారంభం అయిన బిగ్ బాస్ ఇప్పటికే నాలుగు సీజన్ లు ముగించుకుంది. ఈ ఏడాది అయిదవ సీజన్‌ ప్రారంభం అవ్వాల్సి ఉన్నా కూడా కరోనా సెకండ్‌ వేవ్‌ వల్ల ఆలస్యం అవుతుందని ఇన్నాళ్లు అనుకున్నారు. కాని ఇటీవలే తెలుగు బిగ్ బాస్ షో నిర్వాహకులు ఈ ఏడాదిలో నిర్వాహణ సాధ్యం కాదని తేల్చేశారంటూ వార్తలు వచ్చాయి.

అన్ని కుదిరితే వచ్చే ఏడాది ఆరంభంలో సీజన్ 5ను మొదలు పెట్టాలని భావిస్తున్నారట. తెలుగు బిగ్ బాస్ దారిలోనే తమిళ బిగ్‌ బాస్ కూడా ఈ ఏడాదికి లేనట్లే అంటూ తమిళ ఇండస్ట్రీ వర్గాల్లో టాక్ వినిపిస్తుంది. ప్రస్తుతం కమల్‌ ఆరోగ్యం విషయమై కూడా రకరకాలుగా పుకార్లు షికార్లు చేస్తున్నాయి. ఈ నేపథ్యంలో ఆయన షో ను చేయలేని పరిస్థితిలో ఉన్నాడని కామెంట్స్ కూడా వచ్చాయి. దానికి తోడు సెకండ్‌ వేవ్‌ కారణంగా లాక్ డౌన్ కొనసాగుతుంది. కరోనా ఈ ఏడాది చివరి వరకు పరిస్థితి ఇలాగే ఉంటుందని కనుక షో ను ప్రారంభించినా మలయాళ బిగ్ బాస్ షో ను మద్యలో నిలిపి వేసినట్లుగా నిలిపి వేయాల్సి వస్తుందనే ఉద్దేశ్యంతో అసలు ప్రారంభించవద్దనే నిర్ణయానికి వచ్చారట.

తెలుగు మరియు తమిళంలో బిగ్ బాస్ మంచి విజయాన్ని సొంతం చేసుకుంది. ముఖ్యంగా తెలుగులో నాలుగు సీజన్‌ లు కూడా భారీ రేటింగ్ ను దక్కించుకున్న నేపథ్యంలో అయిదవ సీజన్ కోసం నిర్వాహకులు మరియు కంటెస్టెంట్స్ తో పాటు ప్రేక్షకులు కూడా ఆసక్తిగా ఉన్నారు. ఇలాంటి సమయంలో కరోనా కారణంగా షో ను ఈ ఏడాదిలో లేనట్లే అంటూ వార్తలు రావడంతో నిరాశ వ్యక్తం అవుతోంది. ఈ ఏడాది చివరి వరకు పరిస్థితులు కుదుట పడితే బిగ్‌ బాస్ నిర్వాహకులు ఏమైనా తమ నిర్ణయాన్ని మార్చుకునే అవకాశం ఉందంటున్నారు.