టాలీవుడ్ పై త‌మిళ హీరోల దండ‌యాత్ర‌

టాలీవుడ్ పై త‌మిళ హీరోల దండ‌యాత్ర మొద‌లు కాబోతోందా? .. త‌మిళ ఇండస్ట్రీ త‌ర‌హాలోనే ఇక్క‌డ కూడా పాగా వేయాల‌ని త‌మిళ హీరోలు ప్లాన్ చేసుకుంటున్నారా? అంటే జ‌రుగుతున్న ప‌రిణామాలు అలానే వున్నాయ‌ని టాలీవుడ్ వ‌ర్గాలు అంటున్నాయి. ద‌క్షిణాదిలో అత్యుత్త‌మ‌మైన సినిమాలు రూపొందుతున్న వేళ `బాహుబ‌లి`తో మారిన మార్కెట్ ని దృష్టిలో పెట్టుకుని మ‌న‌ హీరోలు వ‌ర‌ల్డ్ సినిమా మార్కెట్ పై క‌న్నేసిన విషయం తెలిసిందే.

ప్ర‌స్తుతం వ‌రుస పాన్ ఇండియా చిత్రాల‌తో మ‌న వాళ్లు దూసుకుపోతున్న వేళ మ‌న వాళ్ల‌ని త‌మిళ హీరోలు కూడా ఫాలో కావాల‌ని ప్లాన్ చేసుకుంటున్న‌ట్టుగా తెలుస్తోంది. తెలుగు, త‌మిళ భాష‌ల్లో ఏక కాలంలో సినిమాలు చేసి వాటిని తెలుగు హీరోల త‌ర‌హాలో బ‌హుభాషా చిత్రాలుగా పాన్ ఇండియా లెవెల్లో విడుద‌ల చేయాలని ప్లాన్ చేసుకుంటున్నార‌ట‌. ఇందులో భాగంగా ముందు టాలీవుడ్ పై దండయాత్ర‌కు రెడీ అయిపోతున్నారు త‌మిళ హీరోలు.

ఇందులో ముందు వ‌రుస‌లో నిలిచిన హీరో ధ‌నుష్‌. విభిన్న చిత్రాల హీరోగా ధ‌నుష్ కు ద‌క్షిణాదితో పాటు ఉత్త‌రాదిలోనూ మంచి పేరుంది. `రంజానా`తో ఉత్త‌రాదిలోనూ పేరు తెచ్చుకున్న ధ‌నుష్ `అత్రంగిరే`తో మ‌రోసారి బాలీవుడ్ ప్రేక్ష‌కుల్ని ప‌ల‌క‌రించాడు. హిందీలో త‌ప్ప తెలుగులో ఇప్ప‌టి వ‌ర‌కు స్ట్రెయిట్ మూవీని చేయ‌ని ధ‌నుష్ తొలిసారిగా `సార్‌` పేరుతో రూపొందుతున్న బైలింగ్వ‌ల్ మూవీలో న‌టిస్తున్న‌డు. తెలుగు ద‌ర్శ‌కుడు వెంకీ అట్లూరి ఈ మూవీని తెర‌కెక్కిస్తుండ‌గా.. తెలుగు నిర్మాత‌లు సితార ఎంట‌ర్ టైన్‌మెంట్ అధినేత సూర్య దేవ‌ర నాగ‌వంశీ, సాయి సౌజ‌న్య నిర్మిస్తున్నారు.

త్వ‌ర‌లోనే ఈ మూవీ రెగ్యుల‌ర్ షూటింగ్ ప్రారంభం కాబోతోంది. ఇదిలా వుంటే ధ‌నుష్ తో పాటు మ‌రో త‌మిళ హీరో శివ కార్తికేయ‌న్ డైరెక్ట్ గా టాలీవుడ్ పై దండ‌యాత్ర‌కు గ్రీన్ సిగ్న‌ల్ ఇచ్చేశాడు. `జ‌తార‌త్నాలు` ఫేమ్ అనుదీప్ కెవి ఈ మూవీని డైరెక్ట్ చేయ‌బోతున్నాడు. ఈ మూవీని ఏకంగా ముగ్గురు బడా నిర్మాత‌లు నిర్మించ‌బోతున్నారు. శ్రీ వెంక‌టేశ్వ‌ర సినిమాస్ ఎల్ ఎల్ పీ బ్యాన‌ర్, సురేష్ ప్రొడ‌క్ష‌న్స్ , శాంతి టాకీస్ సంయుక్తంగా ఈ మూవీని నిర్మించ‌బోతున్నారు.

దీనికి సంబంధించిన అఫీషియ‌ల్ అనౌన్స్‌మెంట్ ఈ శ‌నివారం న్యూ ఇయ‌ర్ సంద‌ర్భంగా వ‌చ్చేసింది. షూటింగ్ ఎప్పుడు స్టార్ట్ అన్న‌ది ఇంకా క్లారిటీ లేదు. ఇదిలా వుంటే ధ‌నుష్‌, శివ కార్తికేయ‌ల త‌రహాలో సూప‌ర్ స్టార్ విజ‌య్ కూడా ఈ ఏడాది స్ట్రెయిట్ తెలుగు సినిమా చేయ‌బోతున్నాడు. ఇది విజ‌య్ 66 వ సినిమా. ఈ చిత్రాన్ని వంశీ పైడిప‌ల్లి డైరెక్ట్ చేయ‌బోతున్నారు. శ్రీ వెంక‌టేశ్వ‌ర క్రియేష‌న్స్ బ్యాన‌ర్ పై స్టార్ ప్రొడ్యూస‌ర్ దిల్ రాజు నిర్మించ‌బోతున్నారు. విజ‌య్ ప్ర‌స్తుతం చేస్తున్న `బీస్ట్‌` పూర్త‌యి పోగానే వంశీ పైడిప‌ల్లి సినిమా ప‌ట్టాలెక్కుతుంది.

విజ‌య్ న‌టిస్తున్న యాక్ష‌న్ ఎంట‌ర్‌టైన‌ర్ `బీస్ట్` స‌మ్మ‌ర్ కానుక‌గా ఏప్రిల్ లో విడుద‌ల కాబోతోంది. రీసెంట్ మేకర్స్ రిలీజ్ టైమ్ ని ప్ర‌క‌టిస్తూ ఓ పోస్ట‌ర్ ని విడుద‌ల చేశారు. పూజా హెగ్డే హీరోయిన్ గా న‌టిస్తున్న ఈ మూవీని నెల్స‌న్ దిలీప్ కుమార్ తెర‌కెక్కిస్తున్నారు. అనిరుధ్ సంగీతం అందిస్తున్న ఈ మూవీని అత్యంత భారీ బ‌డ్జెట్ తో స‌న్ పిక్చ‌ర్స్ అధినేత క‌ళానిధి మార‌న్ నిర్మిస్తున్నారు.