సైరా పై తమ్మారెడ్డి కామెంట్స్.. మెగా ఫ్యాన్స్ ఫైర్!

సీనియర్ ఫిలింమేకర్ తమ్మారెడ్డి భరద్వాజ గత కొంతకాలంగా సొంత యూట్యూబ్ ఛానెల్ ద్వారా 'నా ఆలోచన' పేరుతో తన అభిప్రాయాలు పంచుకుంటున్నారు. అటు పాలిటిక్స్ నుంచి ఇటు సినిమాల వరకూ ఆయన పలు అంశాల పై తన అభిప్రాయాలను వెల్లడిస్తున్నారు. రీసెంట్ గా తమ్మారెడ్డి మెగాస్టార్ చిరంజీవి కొత్త సినిమా 'సైరా' పై మాట్లాడారు.

"యావరేజ్ టాక్ వచ్చిన సాహోనే దాదాపు 300 కోట్లవరకూ కలెక్షన్స్ సాధించింది. సైరా నరసింహారెడ్డికి ఇంకా బెటర్ క్యాస్ట్ ఉంది.. బెటర్ ఓపెనింగ్ ఉంది. అన్నిభాషల నటులు ఈ సినిమాలో నటించారు. డెఫినిట్ గా రెవిన్యూ విషయంలో కొత్త రికార్డులు సృష్టిస్తుందని నేను అనుకుంటున్నాను. అందులో దాదాపు ఐదు రోజుల పాటు లాంగ్ వీకెండ్ ఉంది కాబట్టి.. ఈ ఐదు రోజుల కలెక్షనే 300 కోట్లు టచ్ చేసినా ఆశ్చర్యపోవాల్సిన పని లేదు. 500 కోట్లు చేస్తుందా.. 600 కోట్లు చేస్తుందా.. లేక 1000 కోట్లా అనేది చూడాలి. సాహో లాగానే ఈసినిమా కు కూడా రూ.200 టికెట్ పెట్టారు. ఐదు రోజుల శెలవులు కూడా వచ్చాయి మరి కలెక్షన్ 300 కోట్ల దగ్గరే ఆగుతుందా.. లేదా 1000 కోట్లు టచ్ చేస్తుందా.. అదీ కాదంటే బాహుబలి లాగా 2000 కోట్లు మార్క్ చేరుతుందా చూద్దాం" అన్నారు.

అయితే తమ్మారెడ్డి భరద్వాజ కామెంట్లు చాలామంది మెగా ఫ్యాన్సుకు నచ్చలేదు. గతంలోనే తమ్మారెడ్డి 'అమ్మడు కుమ్ముడు' సాంగ్ పై తీవ్రంగా విమర్శలు చేశారు. ఈసారి 'సైరా' సినిమా ఎలా ఉంది అనేది మాట్లాడకుండా కలెక్షన్స్ గురించి వెటకారంగా మాట్లాడారని మండిపడుతున్నారు. సహజంగా తమ్మారెడ్డి భరద్వాజ వీడియోలు నాలుగు నిముషాల నుండి పది ఇరవై నిముషాల వరకూ ఉంటాయి కానీ 'సైరా' పై మాట్లాడిన వీడియో జస్ట్ 1.54 నిముషాలు మాత్రమే ఉంది. ఇందులో ఆయన సినిమా ఎలా ఉంది.. చిరంజీవి నటన ఎలా ఉంది అనే అంశాలకంటే కూడా సైరా కలెక్షన్స్ పైనే ఎక్కువగా మాట్లాడారని.. ఇందులోనే ఆయన కడుపులో మంట బైట పడిందని దుమ్మెత్తి పోస్తున్నారు.

'సైరా' 2000 కోట్లు కలెక్ట్ చేస్తుందేమో చూడాలని ఉందని చేసిన వ్యాఖ్య ఆయన స్థాయికి తగదని.. ఇందులో డబల్ మీనింగ్ ఉందని.. ఇలాంటి వంకర మాటలు మాట్లాడవద్దని కొందరు ఫ్యాన్స్ ఆయనపై బూతులతో విరుచుకుపడ్డారు.