డ్రగ్స్ కేసు వేళ.. డ్రగ్ ఎడిక్ట్ అయ్యాడు

అది కాకతాళీయమే కావచ్చు. ఒకసారి జీవితం సినిమాలానే ఉంటుంది. సినిమా క్యారెక్టర్లు అన్నీ కల్పితమే అయినా ఒకోసారి రియల్ లైప్ లోనూ తారసపడొచ్చు. కాకపోతే ఇది చాలా అరుదుగా జరుగుతుంటుంది. ఇలా జరిగితే ఓసారి ఆశ్చర్యం కలిగితే... ఒకోసారి ఆవేదన మిగులుతుంది. రీసెంట్ గా యంగ్ యాక్టర్ తనీష్ కు ఈ అనుభవం ఎదురైంది.

ప్రస్తుతం టాలీవుడ్ ను డ్రగ్స్ వాడకం కేసు షేక్ చేస్తోంది. డ్రగ్స్ సరఫరాదారు కెల్విన్ తో సంబంధం ఉందని అనుమానించిన వారందరికీ ఎక్సైజ్ శాఖ స్పెషల్ ఇన్వెస్టిగేషన్ టీం (సిట్) నోటీసులిచ్చి వరసగా విచారణ చేస్తోంది. ఇలా నోటీసులు అందుకున్న వారిలో యువ నటుడు తనీష్ కూడా ఉన్నాడు. బాలనటుడిగా ఎన్నో సినిమాలు చేసిన తనీష్ ఈమధ్య హీరోగా మారి ఒకటి రెండు సినిమాలు చేశాడు. కానీ అవేం పెద్దగా హిట్ కొట్టలేదు. రీసెంట్ గా కృష్ణవంశీ డైరెక్షన్ లో నక్షత్రం సినిమాలో విలన్ పాత్ర చేస్తున్నాడు. ఈ సినిమా ఆగస్టులో విడుదల కావడానికి సిద్ధంగా ఉంది. ఇందులో తనీష్ డ్రగ్ ఎడిక్ట్ గా కనిపించనున్నాడు. డ్రగ్స్ కు అలవాటు పడి ఆవేశంతో రగిలిపోయే యువకుడిగా ఈ సినిమాలో కనిపిస్తాడు. ఇలా డ్రగ్ ఎడిక్ట్ రోల్ చేస్తున్నవేళ.. ఇప్పుడు రియల్ లైఫ్ లో కూడా డ్రగ్స్ వాడినట్లు అనుమానంతో అతడికి పోలీసులు నోటీసులు ఇవ్వడం కాకతాళీయమనే చెప్పాలి.

సాధారణంగా కృష్ణవంశీ సినిమాల్లో విలన్ పాత్రలు చాలా పవర్ ఫుల్ గా ఉంటాయి. హీరోలతో సమానంగా విలన్లకూ పేరొస్తుంది. హీరో రవితేజ కూడా కృష్ణవంశీ సినిమాలో విలన్ పాత్ర చేసిన వాడే కావడం విశేషం. దీంతో ఇండస్ట్రీలో గుర్తింపు వస్తుందని తనీష్ ఆశలు పెట్టుకున్నాడు. ఏదేమైనా రీల్ లైఫ్ లో ఎదురయ్యే సవాళ్లు రియల్ లైఫ్ లో ఎదురైతే ఎదుర్కోవడం కష్టమే.