వదలని తనూశ్రీ.. ఈసారి షార్ట్‌ ఫిల్మ్‌

ఇండియాలో మీటూ ఉద్యమం ఉవ్వెత్తున ఎగసి పడటానికి ప్రధాన కారణం తనూశ్రీ దత్తా. పదేళ్ల క్రితం తనను సీనియర్‌ నటుడు నానా పటేకర్‌ లైంగికంగా వేదించాడు అంటూ ఆరోపణలు చేసిన తనూశ్రీ దత్తా విషయాన్ని పలు ఇంటర్వ్యూలో చెప్పడంతో అది కాస్త మీటూ ఉద్యమంకు దారి తీసింది. తనూశ్రీ దత్త దారిలో ఎంతో మంది హీరోయిన్స్‌ మరియు ఇతర మహిళలు కూడా మీటూ అంటూ తాము ఎదుర్కొన్న లైంగిక వేదింపులను గురించి సంచలన విషయాలను బయట పెట్టాడు. మీటూ ఉద్యమం ఇప్పుడిప్పుడే సర్దుమణుగుతుంది. ఇలాంటి సమయంలో మళ్లీ తనూశ్రీ దత్తా వేడి పుట్టించేందుకు వస్తోంది.

నానా పటేకర్‌ తో తనూశ్రీ దత్తాకు ఒప్పందం జరిగిందని, అందుకే ఆమె విదేశాలకు వెళ్లిందని ప్రచారం జరిగింది. అయితే తనూశ్రీ దత్తా ఈ విషయాన్ని అంత తేలికగా వదిలేలా లేదని మరోసారి వెళ్లడయ్యింది. తాజాగా ఈమె ఇన్సిఫిరేషన్‌ అనే షార్ట్‌ ఫిల్మ్‌ తో ప్రేక్షకుల ముందుకు వచ్చేందుకు సిద్దం అయ్యింది. మహిళా దినోత్సవం సందర్బంగా విడుదల కాబోతున్న ఈ షార్ట్‌ ఫిల్మ్‌ లో మీటూ ఉద్యమం గురించి, తాను ఎదుర్కొన్న లైంగిక వేదింపుల గురించి తనూశ్రీ దత్తా చూపించబోతుంది.

'ఇన్సిపిరేషన్‌'కు సంబంధించిన టీజర్‌ ను విడుదల చేయడం జరిగింది. ఉల్లు ఒరిజినల్స్‌ ద్వారా విడుదల కాబోతున్న ఈ షార్ట్‌ ఫిల్మ్‌ లో తనూశ్రీ దత్తా గార్డియన్‌ ఏంజెల్‌ అనే పాత్రను పోషించిందట. ఆ పాత్ర కోసం స్వయంగా తనూశ్రీ డైలాగ్స్‌ రాసుకుందని సమాచారం అందుతోంది. మొత్తానికి తనూశ్రీ దత్తా మరోసారి నానా పటేకర్‌ ను టార్గెట్‌ చేయడం ఖాయమంటూ గుసగుసలు వినిపిస్తున్నాయి.