'మిషన్ ఇంపాజిబుల్' తో తాప్సీ టాలీవుడ్ కు తిరిగొచ్చింది..!

'ఝుమ్మందినాధం' సినిమాతో టాలీవుడ్ లో హీరోయిన్ గా అడుగుపెట్టిన సొట్టబుగ్గల సుందరి తాప్సీ పన్నూ.. ఆ తర్వాత 'మిస్టర్ పర్ఫెక్ట్' 'గుండెల్లో గోదారి' 'సాహసం' 'ఘాజీ' 'ఆనందో బ్రహ్మ' 'నీవెవరో' వంటి చిత్రాలతో మెప్పించింది. ఈ క్రమంలో బాలీవుడ్ లో అడుగుపెట్టి వరుస సినిమాలతో అక్కడ సత్తా చాటుతోంది. చివరగా 'గేమ్ ఓవర్' అనే హిందీ తెలుగు బైలింగ్విల్ లో కనిపించిన తాప్సీ.. మళ్ళీ టాలీవుడ్ కి రావడానికి మంచి కథ కోసం ఎదురుచూసింది. ఈ నేపథ్యంలో ఇప్పుడు ''మిషన్ ఇంపాజిబుల్'' (Mishan Impossible) సినిమాతో తెలుగులో ఎంట్రీ ఇస్తోంది.

'ఏజెంట్ సాయి శ్రీనివాస్' ఫేమ్ స్వరూప్ ఆర్.ఎస్.జె దర్శకత్వంలో 'మిషాన్ ఇంపాజిబుల్' సినిమా తెరకెక్కుతోంది. మ్యాట్నీ ఎంటర్టైన్మెంట్ బ్యానర్ పై నిరంజన్ రెడ్డి - అన్వేష్ రెడ్డి లు ఈ చిత్రాన్ని నిర్మిస్తున్నారు. ఇందులో తాప్సీ ప్రధాన పాత్ర పోషిస్తోంది. తెలుగులోకి తిరిగి రావడానికి ఇదే సరైన స్క్రిప్ట్ అని భావించిన ఈ బ్యూటీ.. తాజాగా షూటింగ్ లో జాయిన్ అయ్యారు. ఈ నేపథ్యంలో తాప్సీకి సంబంధించిన ఓ వర్కింగ్ స్టిల్ ని చిత్ర యూనిట్ షేర్ చేశారు. ఇందులో తాప్సీ విరిగిన చేతికి కట్టుకట్టుకొని లాప్ టాప్ ముందు కూర్చొని ఏదో ఆతృతగా చూస్తూ ఉంది.

తాప్సీ ఈ ప్రాజెక్టులో భాగం కావడానికి చాలా ఉత్సాహంగా ఉన్నట్లు తెలుస్తోంది. ''నన్ను ప్రేక్షకులు ఎలాంటి పాత్రల్లో చూడాలనుకుంటారో అలాంటి కథల్లో భాగం కావాలని గత 7 సంవత్సరాలుగా చూస్తున్నాను. 'మిషన్ ఇంపాజిబుల్' అలాంటి వాటిలో ఒకటి. నేను సినిమాను ఎన్నుకునేటప్పుడు ఆకట్టుకునే కథాంశం మరియు మంచి బృందం నాకు చాలా ముఖ్యం. నాణ్యమైన చిత్రాలను ఎన్నుకోవడంలో ప్రేక్షకులు నాపై ఉంచిన నమ్మకాన్ని నేను పునరుద్ఘాటించాలి అనుకుంటున్నాను. ఇలాంటి సినిమాలో భాగం కావడం ద్వారా అది చేస్తున్నానని ఖచ్చితంగా నమ్ముతున్నాను'' అని తాప్సీ చెప్పింది.

కాగా, 'Mishan Impossible' సినిమా తిరుపతికి దగ్గరలోని ఓ గ్రామంలో జరిగే హంటింగ్ ఫిల్మ్ అని తెలుస్తోంది. 'ఏజెంట్ సాయి శ్రీ‌నివాస ఆత్రేయ‌' సినిమాతో ప్రసంశలు అందుకున్న స్వరూప్.. మరోసారి డిఫెరెంట్ కాన్సెప్ట్ తో వస్తున్నాడు. ఇప్పటికే విడుదలైన థీమ్ పోస్టర్ విశేష స్పందన తెచ్చుకుంది. ఈ చిత్రానికి మార్క్ కె.రాబిన్ సంగీతం సమకూరుస్తుండగా.. దీపక్ యారగర సినిమాటోగ్రాఫర్ గా వ్యవహరిస్తున్నారు. రవితేజ గిరిజాల ఎడిటింగ్ వర్క్ చేయనున్నారు.