తాత ని గుర్తు చేసిన తారక్..!

నందమూరి తారకరామారావు మనవడిగా ఇండస్ట్రీలో అడుగుపెట్టిన జూనియర్ ఎన్టీఆర్.. ప్రస్తుతం టాలీవుడ్ స్టార్ హీరోల్లో ఒకరిగా రాణిస్తున్నారు. తాత పోలికలు పునికి పుచ్చుకోవడమే కాదు.. నటనలో డైలాగ్ డెలివరీలో తాతకు తగ్గ మనవడు అనిపించుకున్నారు.

తాత మీదున్న ప్రేమాభిమానంతో తారక్ తన సినిమాలలో ఆయన్ను తలచుకోవడం.. డైలాగులలో ఆయన్ను అనుకరించడం చేస్తుంటారు. ఇప్పుడు లేటెస్టుగా ఎన్టీఆర్ నటించిన 'ఆర్.ఆర్.ఆర్' చిత్రంలో కొన్ని గెటప్స్ లో తన తాతని గుర్తు చేసి అందరినీ ఆశ్చర్యపరిచాడు.

దర్శకధీరుడు ఎస్ఎస్ రాజమౌళి దర్శకత్వంలో రామ్ చరణ్ తో కలిసి ఎన్టీఆర్ నటించిన సినిమా 'ఆర్ ఆర్ ఆర్'. యావత్ సినీ అభిమానులు ఆసక్తిగా ఎదురుచూస్తున్న ఈ పీరియాడికల్ యాక్షన్ డ్రామాలో కొమురం భీమ్ గా తారక్.. అల్లూరి సీతారామరాజుగా చరణ్ కనిపించనున్నారు.

RRR మూవీ మార్చి 25న ప్రేక్షకుల ముందుకు రానున్న నేపథ్యంలో మేకర్స్ తిరిగి ప్రమోషన్స్ ప్రారంభించారు. ఇందులో భాగంగా సోమవారం సాయంత్రం 'ఎత్తర జెండా' అనే ప్రచార గీతాన్ని విడుదల చేశారు. ఇందులో తారక్ - చెర్రీ డిఫరెంట్ లుక్స్ లో కనిపించి ఆకట్టుకున్నారు.

ముఖ్యంగా పంచెకట్టులో తలపాగాతో ఉన్న ఎన్టీఆర్ లుక్స్ నందమూరి అభిమానులను అమితంగా ఆకర్షించాయి. కొన్ని చోట్ల అచ్చు గుద్దినట్లు తన తాత తారక రామారావుగా కనిపించారు తారక్. దీంతో తాతామనవళ్ళ ఫోటోలను పక్కపక్కనే పెట్టి ఫ్యాన్స్ వైరల్ చేసేస్తున్నారు.

రాజమౌళి - ఎన్టీఆర్ కాంబినేషన్ లో గతంలో వచ్చిన 'స్టూడెంట్ నెం.1' 'సింహాద్రి' సినిమాలో రామారావు రెఫరెన్స్ లు ఉన్నాయి. 'యమదొంగ' సినిమాలో గ్రాఫిక్స్ ఉపయోగించి ఏకంగా తారక్ పక్కన తారకరాముడితో డ్యాన్స్ చేయించారు.

ఇప్పుడు 'ఆర్.ఆర్.ఆర్' సినిమా మల్టీస్టారర్ కావడం.. మెగా ఫ్యామిలీకి చెందిన రామ్ చరణ్ మరో హీరో కావడంతో సీనియర్ ఎన్టీఆర్ ప్రస్తావన ఉండకపోవచ్చు. అయినప్పటికీ 'ఎత్తర జెండా' పాటలో జూనియర్ లుక్ తాతని పోలి ఉండటంతో నందమూరి ఫ్యాన్స్ ఖుషీ అవుతున్నారు.