తారకరత్న సిక్స్ ప్యాక్

పెద్ద ఎన్టీఆర్ కు ‘బొబ్బిలి పులి’ ఎలాగో.. చిన్న ఎన్టీఆర్ కు ‘కాకతీయుడు’ అలా అంటున్నాడు నిర్మాత లగడపాటి శ్రీనివాస్. చిన్న ఎన్టీఆర్ అంటే ఇక్కన జూనియర్ ఎన్టీఆర్ అనుకోకండి. ఈ నిర్మాత మాట్లాడుతోంది తన హీరో నందమూరి తారకరత్న గురించి. సముద్ర-తారకరత్న కాంబినేషన్లో చాన్నాళ్ల కిందటే ‘కాకతీయుడు’ అనే సినిమా తెరకెక్కిన సంగతి చాలా మందికి తెలియదు. ఈ మధ్య ‘రాజా చెయ్యి వేస్తే’లో విలన్.. ‘మనమంతా’లో క్యారెక్టర్ రోల్స్ చేయడంతో తారకరత్న కొద్దిగా వార్తల్లోకి వచ్చాడు. ఇదే మంచి తరుణం అని భావించి.. ‘కాకతీయుడు’ను బయటికి తీస్తున్నారు. ఈ శుక్రవారమే ‘శ్రీరస్తు శుభమస్తు’.. ‘మనమంతా’ చిత్రాలతో పాటు ‘కాకతీయుడు’ కూడా విడుదల కాబోతోంది.

ఈ నేపథ్యంలో ఏర్పాటు చేసిన విలేకరుల సమావేశంలో నిర్మాత మాట్లాడుతూ.. ‘‘ఎన్టీఆర్ కు బొబ్బిలిపులి.. బాలయ్యకు సింహా.. జూనియర్ ఎన్టీఆర్ కు ఆది.. కళ్యాణ్ రామ్ కు ‘అతనొక్కడే’ ఎలాగో తారకరత్నకు ‘కాకతీయుడు’ అలా. ఈ సినిమాతో తారకరత్నకు గొప్ప పేరు వస్తుంది’’ అని చెప్పాడు. ఇక దర్శకుడు సముద్ర మాట్లాడుతూ ‘కాకతీయుడు’ కోసం తారకరత్న సిక్స్ ప్యాక్ చేసినట్లు చెప్పాడు. ‘‘తారకరత్న ఈ సినిమాలో ద్విపాత్రాభినయం చేశాడు. అన్న పాత్రలో లావుగా.. తమ్ముడి పాత్రలో సన్నగా కనిపిస్తాడు. అన్న పాత్ర కోసం తారకరత్న సిక్స్ ప్యాక్ కూడా చేశాడు. రెండు పాత్రలకు వేర్వేరుగా కనిపించాల్సి ఉండటంతో పది నెలల పాటు షూటింగే చేయలేదు’’ అన్నాడు.