ఏం పీకుతారన్న వారికి ఇదే నా సమాధానం

మెగా ఫ్యామిలీకి సన్నిహింతంగా ఉండే బన్నీ వాసు ఇప్పటికే నిర్మాతగా దూసుకు పోతున్నాడు. వరుసగా మంచి చిత్రాలు - హిట్‌ చిత్రాలను నిర్మిస్తూ వస్తున్నాడు. తాజాగా అల్లు అర్జున్‌ కు పర్సనల్‌ పీఆర్‌ గా చాలా కాలం నుండి చేస్తున్న ఎస్‌ కే ఎన్‌ ‘ట్యాక్సీవాలా’ చిత్రంతో సోలో నిర్మాతగా మారిన విషయం తెల్సిందే. సోలో నిర్మాతగా ఎస్‌ కే ఎన్‌ చేసిన ట్యాక్సీవాలాకు ఆయన ఎన్నో ఇబ్బందులు ఎదుర్కొన్నాడు. సినిమా విడుదలకు కొన్ని నెలల ముందే ఆన్‌ లైన్‌ లో లీక్‌ అవ్వడంతో చిత్రం విడుదల పై అనుమానాలు వ్యక్తం అయ్యాయి.

ఆన్‌ లైన్‌ లో లీక్‌ అయిన సినిమాను చూసిన వారు బ్యాడ్‌ కామెంట్స్‌ పెట్టే వారు. తాజాగా సినిమా లీక్‌ అయిన సమయంలో తాను ఎదుర్కొన్న మనోవేధనను ఒక ఇంటర్వ్యూలో చెప్పుకొచ్చాడు. సినిమా విడుదలకు ముందే లీక్‌ అవ్వడంతో ఏం చేయాలో అర్థం కాలేదు. సినిమా ప్రమోషన్‌ లో భాగంగా అప్పుడప్పుడు పోస్టర్స్‌ ను సోషల్‌ మీడియాలో పెట్టినప్పుడు రకరకాలుగా కామెంట్స్‌ వచ్చాయి. ఒక వ్యక్తి ట్యాక్సీవాలా పోస్టర్‌ కు ఇప్పటికే లీక్‌ అయ్యి, బ్యాడ్‌ టాక్‌ తెచ్చుకున్న సినిమాను విడుదల చేసి ఏం పీకుతారు అంటూ కామెంట్‌ చేశాడు. ఆ కామెంట్‌ నన్ను తీవ్రంగా వేదించింది. అయితే ఆ కామెంట్‌ ను స్క్రీన్‌ షాట్‌ తీసి పెట్టుకున్నాను.

సినిమా విడుదలైన తర్వాత దాంతోనే అతడికి సమాధానం చెప్పాలనుకున్నాను. నేను అనుకున్నట్లుగానే సినిమా సక్సెస్‌ అయ్యింది. ఇప్పుడు అతడికి ఇదే మేం పీకింది అంటూ సమాధానం చెబుతున్నాను అన్నాడు. సోషల్‌ మీడియాలో సినిమా వారిని ట్రోల్‌ చేసి కొందరు రాక్షస ఆనందం పొందుతారు. అలాంటి వారు అకౌంట్‌ ఫేక్‌, ఫొటో ఫేక్‌, పేరు ఫేక్‌ ఉంటుందని ఎస్‌ కే ఎన్‌ అభిప్రాయం వ్యక్తం చేశాడు. సినిమా వారిని ట్రోల్‌ చేసేవారు దమ్ముంటే ఒరిజినల్‌ ఫొటోలు పెట్టుకుని, వారి సొంత పేరుతో చేయాలని ఎస్‌ కే ఎన్‌ సవాల్‌ చేశాడు.