సర్దార్ సెట్లో ఫ్యాన్సీ డ్రెస్ కాంపిటీషనా?

పవన్ కళ్యాణ్ సినిమా హంగామా ఎలా ఉంటుందో జనాలకు ఇప్పుడు బాగా అర్థమవుతోంది. మొన్నటిదాకా ‘సర్దార్ గబ్బర్ సింగ్’ ఎక్కువ నెగెటివ్ న్యూస్ లతోనే వార్తల్లో ఉండేది. కానీ ఇప్పుడు ఈ సినిమా పాజిటివ్ వైబ్రేషన్స్ క్రియేట్ చేస్తోంది. ‘సర్దార్’ విషయంలో ఒక రకమైన హిస్టీరియా కనిపిస్తోంది అభిమానుల్లో. విడుదల తేదీ దగ్గర పడుతుండగా పవన్ కళ్యాణ్ అండ్ కో తమదైన శైలిలో అభిమానుల్ని ఉర్రూతలూగించే ప్రోగ్రామ్స్ మొదలుపెట్టేసింది. ఆల్రెడీ మేకింగ్ వీడియో సెన్సేషన్ క్రియేట్ చేస్తుంటే.. దీంతో పాటుగా ఆసక్తికరమైన కొన్ని ఫొటోల్ని కూడా రిలీజ్ చేసి సినిమా మీద హైప్ పెంచేస్తోంది.

సర్దార్ టీమ్ లేటెస్టుగా వదిలిన ఫొటో ఆసక్తి రేపుతోంది. ఇది ‘సర్దార్ గబ్బర్ సింగ్’ సెట్లో తీసిన ఫొటో. పవన్ ఒక్కడు ఖాకీ దుస్తులు - ఎర్ర రుమాలుతో కనిపిస్తుంటే.. మిగతా వాళ్లందరూ విచిత్రమైన డ్రెస్సుల్లో దర్శనమిస్తున్నారు. కాశీ విశ్వనాథ్ - రఘుబాబు - తనికెళ్ల భరణి - బ్రహ్మానందం - ఆలీ - బ్రహ్మాజీ - నర్రా శీను - కృష్ణభగవాన్ - ప్రభాస్ శీను ఈ ఫొటోలో కనిపిస్తున్నారు. వీళ్లంతా ఒక్కొక్కరు ఒక్కో రకమైన డ్రెస్ లో కనిపిస్తున్నారు. చూస్తుంటే ఏదో ఫ్యాన్స్ డ్రెస్ కాంపిటీషన్ కు వచ్చినట్లుగా కనిపిస్తున్నారు వీళ్లంతా. బహుశా ‘సర్దార్..’లో అలాంటి సన్నివేశం ఏదైనా ఉందో ఏంటో మరి. రెండు పాటలు మినహా షూటింగ్ పూర్తి చేసుకున్న ‘సర్దార్ గబ్బర్ సింగ్’ ఏప్రిల్ 8న ప్రేక్షకుల ముందుకు రాబోతున్న సంగతి తెలిసిందే.