టీజర్: మహాభారతాన్ని యుద్ధం లేకుండా ఊహించుకోమని చెప్తున్న 'సుల్తాన్'

కోలీవుడ్ హీరో కార్తీ తాను నటించే ప్రతీ సినిమాను తెలుగులో కూడా విడుదల చేస్తూ ఇక్కడి ప్రేక్షకులకు బాగా దగ్గరయ్యాడు. ఈ క్రమంలో కార్తీ నటిస్తున్న లేటెస్ట్ మూవీ ''సుల్తాన్‌'' చిత్రాన్ని కూడా రిలీజ్ చేస్తున్నారు. 'రెమో' ఫేమ్ బక్కియరాజ్‌ కణ్ణన్‌ ఈ చిత్రానికి దర్శకత్వం వహించారు. డ్రీమ్‌ వారియర్‌ పిక్చర్స్‌ బ్యానర్‌ పై ఎస్.ఆర్ ప్రకాష్ బాబు - ఎస్.ఆర్ ప్రభు నిర్మించారు. ఇప్పటికే విడుదలైన ప్రచార చిత్రాలు సినిమాపై ఆసక్తిని కలిగించాయి. ఈ క్రమంలో తాజాగా
'సుల్తాన్‌' టీజర్ ని చిత్ర యూనిట్ విడుదల చేసింది.

'మహాభారతం చదివావా.. భారతంలో కృష్ణుడు వంద అవకాశాలు ఇచ్చినా కౌరవులు మారలేదు.. నువ్వు ఇవ్వమంటుంది ఒక్క అవకాశమే కదా.. ఇస్తా..' అనే వాయిస్ ఓవర్ తో ఈ టీజర్ ప్రారంభమైంది. 'భారతంలో కృష్ణుడు పాండవుల పైపు నిలబడ్డాడు.. అదే కృష్ణుడు కౌరవుల వైపు ఉంటే.. అదే మహాభారతాన్ని యుద్ధం లేకుండా ఊహించుకోండి' అంటూ కార్తీ చెప్పే డైలాగ్ సినిమా నేపథ్యాన్ని వెల్లడిస్తోంది. ఇక ఇందులో కార్తీ పెద్ద కొరడా పట్టుకొని చేసే ఫైట్ హైలైట్ గా నిలిచింది. దీనికి మ్యూజిక్ డైరెక్టర్ వివేక్ మెర్విన్ నేపథ్య సంగీతం అదనపు ఆకర్షణగా నిలిచింది. సత్యన్ సూర్యన్ సినిమాటోగ్రఫీ అందించిన ఈ చిత్రానికి రూబెన్ ఎడిటింగ్ వర్క్ చేశారు.

ఇందులో కార్తీ సరసన లక్కీ బ్యూటీ రష్మిక మందన్న హీరోయిన్ గా కనిపించింది. టాలీవుడ్ శాండిల్ వుడ్ లలో స్టార్ హీరోయిన్ గా కొనసాగుతున్న రష్మిక కు ఇది తమిళ డెబ్యూ మూవీ. ఈ చిత్రంలో సీనియర్ నటుడు నెపోలియన్ - లాల్ - యోగిబాబు ఇతర ప్రధాన పాత్రల్లో కనిపిస్తున్నారు. మొత్తం మీద తాజాగా విడుదలైన ఈ యాక్షన్ పాక్డ్ టీజర్ తో సినిమాపై అంచనాలు పెరిగాయని చెప్పవచ్చు. కరోనా కారణంగా వాయిదా పడుతూ వచ్చిన 'సుల్తాన్' చిత్రాన్ని తెలుగు తమిళ భాషల్లో ఏప్రిల్ 2వ తేదీన థియేటర్స్ లో విడుదల చేస్తున్నట్లు మేకర్స్ ప్రకటించారు.