తీస్ మార్ ఖాన్ `స‌మ‌యానికి` వీడియో సాంగ్

ఎంపిక చేసుకున్న ప్ర‌తి సినిమాతో న‌ట‌న ప‌రంగా మెరుగ‌వుతున్నాడు ఆది సాయికుమార్. `ప్రేమ కావాలి` చిత్రంతో హీరోగా తెరంగేట్రం చేసిన అత‌డు ల‌వ్ లీ- గాలి ప‌టం చిత్రాల‌తో విజ‌యాలు అందుకున్నాడు.

ప్ర‌స్తుతం అత‌డు అర‌డ‌జ‌ను చిత్రాల‌తో బిజీగా ఉన్నాడు. నాటకం ఫేమ్ కల్యాణ్ జీ గోగన దర్శకత్వంలో కొత్త చిత్రం `తీస్ మార్ ఖాన్` (స్టూడెంట్-రౌడీ-పోలీస్) త్వ‌ర‌లో విడుద‌ల‌కు సిద్ధం కానుంది. ఈ చిత్రంలో పాయల్ రాజ్‌పుత్ ఆది ప్రేమికురాలిగా నటిస్తుండగా.. కమెడియన్ నుండి హీరోగా మారిన సునీల్ ఈ చిత్రంలో ఒక ముఖ్యమైన పాత్రలో కనిపించనున్నారు. ఇటీవలే ఫస్ట్ లుక్ పోస్టర్ ను విడుదల చేయ‌గా చ‌క్క‌ని స్పంద‌న వ‌చ్చింది.

ఈ హై వోల్టేజ్ యాక్షన్ డ్రామాలో ఆది యాక్షన్-ప్యాక్డ్ పాత్రను పోషిస్తున్నారు. ఫస్ట్ లుక్ పోస్టర్ లో మాస్ అవతార్ లో ఉన్న ఆది నోటిలో సిగరెట్ తో స్టైలిష్ గా క‌నిపించాడు. తుపాకులు కత్తులు వంటి కొన్ని మారణాయుధాలతో ఆది సావాసం యాక్ష‌న్ పాత్రకు భారీ ఎలివేషన్ ఇచ్చింది.

ఈ సినిమా నుంచి వ‌రుస‌గా సింగిల్స్ విడుద‌ల‌వుతున్నాయి.గతంలో పలు విజయవంతమైన చిత్రాలకు సంగీతం అందించిన సాయి కార్తీక్ ఈ చిత్రానికి సంగీతం అందిస్తున్నారు. తాజాగా ఈ మూవీ నుంచి స‌మ‌యానికి అంటూ సాగే వీడియో గీతాన్ని విడుద‌ల చేస్తున్నామ‌ని టీమ్ ప్ర‌క‌టించింది.

25 జూలై 1.05 నిమిషాల‌కు ఈ పాట విడుద‌ల కానుంది. ఇక ఈ చిత్రంలో పాయ‌ల్ రాజ్ పుత్ తో ఆది రొమాన్స్ మ‌రో లెవల్లో ఉండ‌నుంద‌ని పాట‌లు పోస్ట‌ర్లు వెల్ల‌డిస్తున్నాయి.బాల్ రెడ్డి సినిమాటోగ్రఫీ అందిస్తుండ‌గా.. మణికాంత్ ఎడిటింగ్ వ‌ర్క్ చేస్తున్నారు.

ఈ చిత్రాన్ని నాగం తిరుపతి రెడ్డి నిర్మిస్తున్నారు. ఆది మంచి బ్రేక్ కోసం ఎదురు చూస్తున్నాడు. ఆ బ్రేక్ తీస్ మార్ ఖాన్ తో వ‌స్తుందేమో వేచి చూడాలి. జంగిల్- కిరాత‌క‌- అమ‌ర‌న్ ఇన్ ది సిటీ చాప్ట‌ర్1 -CSI స‌నాత‌న్ - క్రేజీ ఫెలో- టాప్ గేర్ లాంటి చిత్రాల్లో న‌టిస్తున్నాడు.