పాత బాటిల్‌ లో కొత్త సారాయి పోస్తున్నారంతే

టాలీవుడ్‌ లో లవ్‌ స్టోరీలు తీసి ట్రెండ్‌ సెట్‌ చేయాలంటే తేజ తర్వాతే. ఇటీవలి కాలంలో ట్రాక్‌ మార్చి కొన్ని పరాజయాల్ని చవిచూశాడు కానీ, అతడిలో తిరిగి మణిరత్నంలా విజృంభించే సత్తా ఉందనడంలో అతిశయోక్తి లేదు. చిత్రం, నువ్వు -నేను, జయం వంటి బ్లాక్‌ బస్టర్‌ హిట్స్‌ తెరకెక్కించిన తేజ మరోసారి ఆ మ్యాజిక్‌ ని రిపీట్‌ చేసేందుకు రెడీ అవుతున్నాడు. హోరాహోరీ అనే టైటిల్‌ తో ఓ ప్రేమకథా చిత్రాన్ని తెలుగు ప్రేక్షకులకు అందించబోతున్నాడు.

అయితే ఈసారి కొత్తగా ఏం తీస్తున్నావ్‌ గురూ? అని ప్రశ్నిస్తే పకపకా నవ్వేశాడు. పాత బాటిళ్లలో కొత్త సారాయి పోసినా తెలుగు ప్రేక్షకులు భరిస్తారు. క్రిటిక్స్‌ కూడా 3.5, 4 రేటింగులు ఇచ్చి గౌరవిస్తున్నారు. తెలుగులో పదే పదే అవే కథలతో రిపీటెడ్‌ గా సినిమాలొస్తూనే ఉంటాయి. హిట్‌ కొడుతూనే ఉంటాయి. బాబుగారు, గుండమ్మ కథ చిత్రాల్నే తిప్పి తిప్పి తీసినా జనాలు చూస్తున్నారు. కథల్ని రీసైక్లింగ్‌ చేయడం తెలిస్తే చాలు... అంటూ వ్యంగ్యాస్త్రం విసిరాడు. అయితే తాను మాత్రం ఈసారి అలాంటి పాతకథ జోలికి వెళ్లకుండా కొత్తగా ఎటెంప్ట్‌ చేశానని చెబుతున్నాడు. మరి తేజ ఎలాంటి కొత్త ప్రేమకథని చూపించబోతున్నాడో చూడాలి.