రాజు.. మంత్రి.. చేతులు కలుపుతున్నారు

డైరెక్టర్ తేజ అటు తిరిగి ఇటు తిరిగి మళ్లీ ఎక్కడ ముగించాడో అక్కడకే వచ్చాడు. కొన్నాళ్లగా వరస ఫ్లాపులతో సతమతమైన తేజ చివరగా రానా హీరోగా నటించిన నేనే రాజు.. నేనే మంత్రి సినిమాతో తిరిగి హిట్ కొట్టాడు. పొలిటికల్ జోనర్ లో సినిమా తీసి అందరినీ మెప్పించాడు. నేనే రాజు.. నేనే మంత్రి తరవాత తేజకు ఒక్కసారిగా డిమాండ్ పెరిగింది.

సురేష్ ప్రొడక్షన్స్ బ్యానర్ లో వెంకటేష్ హీరోగా... ఎన్.టి.రామారావు జీవిత గాథతో బాలకృష్ణ హీరోగా సినిమాలు తీసేందుకు తేజకు ఒకేసారి ఆఫర్లు వచ్చాయి. వెంకటేష్ తో సినిమా మొదలు పెట్టకుండానే ఆగిపోతే.. ఎన్టీఆర్ బయోపిక్ కొబ్బరికాయ కొట్టాక ఆగిపోయింది. దీంతో మరోసారి తనకు సెకండ్ లైఫ్ ఇచ్చిన రానాతోనే సినిమా తీసేందుకు తేజ రెడీ అవుతున్నాడని తెలుస్తోంది. 1971 భారత్ - పాక్ ల మధ్య జరిగిన యుద్ధం నేపథ్యంగా తేజ ఓ స్టోరీ రెడీ చేశాడట. రానాకు ఈ సబ్జెక్టు వినిపించడంతో అతడు గ్రీన్ ఇచ్చాడని లేటెస్ట్ టాక్. ఇందులో రానా పైలట్ గా కనిపించనున్నాడు.

రానా ఇంతకుముందు భారత్ - పాక్ యుద్ధం నేపథ్యంలోనే ఘాజీ సినిమా చేశాడు. అందులో రానా నేవీ ఆఫీసర్ గా నటించాడు. మరోసారి అదే తరహా సబ్జెక్టు అయినా తేజ రెడీ చేసిన స్క్రిప్ట్ నచ్చడంతో ఓకే చెప్పాడని రానా సన్నిహితులు చెబుతున్నారు. ప్రస్తుతం రానా చేస్తున్న తమిళ్ మూవీ మదై తిరందు.. హాథీ మేరా సాథీల షూటింగ్ తరవాత తేజీ మూవీ షూటింగ్ స్టార్ట్ చేసే అవకాశముంది.