మహేష్ ను వాడేసుకుంటున్న ఐస్ క్రీమ్ పాప

తేజస్వి మదివాడ.. మహేష్ సినిమా ‘సీతమ్మ వాకిట్లో సిరిమల్లె చెట్టు’లో నాక్కొంచెం క్యాస్ట్ ఫీలింగ్ ఎక్కువ అంటూ ఓ చిన్న క్యారెక్టర్ లో సందడి చేసి.. ఆపై రామ్ గోపాల్ వర్మ ‘ఐస్ క్రీమ్’ మూవీతో ఏకంగా హీరోయిన్ రోల్ కొట్టేసింది. ఆ తర్వాత ఆమెకు హీరోయిన్ గా పెద్దగా అవకాశాలు రాలేదు కానీ.. కీలకమైన పాత్రలైతే చేస్తోంది తేజస్వి. ఈ మధ్యే ‘శ్రీమంతుడు’ సినిమాలో ఓ చిన్న పాత్రలో కనిపించిన ఈ తెలుగమ్మాయి మళ్లీ హీరోయిన్ అవతారమెత్తుతోంది. శ్రీమంతుడు సినిమాలోని సూపర్ హిట్ పాట ‘జతకలిసే..’ పల్లవే ఆమె సినిమాకు టైటిల్ కాబోతుండటం విశేషం. అశ్విన్ అనే కొత్త కుర్రాడు హీరోగా నటిస్తున్న ఈ సినిమాకు ‘జతకలిసే’ అనే టైటిల్ ఖరారు చేశారు. నూతన నిర్మాణ సంస్థ ‘యుక్త క్రియేషన్స్’ పతాకంపై నరేష్ రావూరి నిర్మిస్తున్నాడు. ‘అలామొదలైంది’ ఫేమ్ స్నిగ్ధ ఓ ప్రధానపాత్రలో నటిస్తోంది.

దర్శకేంద్రుడు కె.రాఘవేంద్రరావు, మాటీవీ సంయుక్తంగా నిర్వహించిన ‘రేపటి దర్శకులు’ అనే కార్యక్రమంలో టాప్-10లో చోటు సంపాదించి.. పరుచూరి బ్రదర్స్, చిన్నికృష్ణ వంటి స్టార్ రైటర్లు.. రామ్ గోపాల్ వర్మ, గుణ శేఖర్ వంటి టాప్ డైరెక్టర్ల దగ్గర పని చేసిన రాకేష్ శశి ఈ చిత్రంతో దర్శకుడిగా పరిచయం అవుతున్నారు. జర్నీ నేపథ్యంలో సాగే ఈ ప్రేమ కథని వైజాగ్, అన్నవరం, రాజమండ్రి, రామచంద్రాపురం, రంపచోడవరం అటవీ ప్రాంతాలతో పాటు హైదరాబాద్ పరిసర ప్రాంతాల లో చిత్రీకరించారు. ప్రస్తుతం పోస్ట్ ప్రొడక్షన్ కార్యక్రమాలను జరుపుకుంటుంది. వినాయక చవితి సందర్భంగా ఈ సినిమా ఫస్ట్ లుక్ ను విడుదల చేయబోతున్నారు. ఈ సినిమాతో విక్కీ అనే కొత్త సంగీత దర్శకుడు పరిచయమవుతున్నాడు.