వచ్చే వారం ఏం సినిమాలొస్తాయ్?

‘బాహుబలి: ది కంక్లూజన్’ తర్వాత తెలుగులో భారీ సినిమాలేవీ రాలేదు. ఉన్నంతలో ‘రారండోయ్ వేడుక చూద్దాం’ మాత్రమే కొంచెం పెద్ద సినిమా. మిగతావన్నీ దాదాపుగా చిన్న సినిమాలే. వారానికి రెండు చొప్పున సినిమాలు షెడ్యూల్ అవుతున్నాయి. ఈ వారాంతంలో ‘అమీతుమీ’తో పాటు ‘ఆరడుగుల బుల్లెట్’ కూడా రావాల్సింది. కానీ ఆర్థిక సమస్యల కారణంగా ఆ సినిమా వాయిదా పడటంతో ‘అమీతుమీ’ మాత్రమే ప్రేక్షకుల ముందుకొచ్చింది. ఆ సినిమా మంచి టాక్‌ తో బాగానే నడుస్తోంది. వచ్చే వారం చెప్పుకోదగ్గ పెద్ద సినిమాలేమీ లేవు. తర్వాతి వీకెండ్లో ‘దువ్వాడ జగన్నాథం’ రిలీజవుతున్న నేపథ్యంలో ముందు వారం ఓ మోస్తరు సినిమాలేవీ రిలీజవ్వట్లేదు. రిలీజ్ కోసం చూస్తున్న సినిమాలు చాలానే ఉన్నాయి కానీ.. అవేవీ ఈ వీకెండ్ మీద కన్నేయలేదు.

ఈ ఖాళీ చూసుకుని ఓ ఆసక్తికర చిన్న సినిమా రేసులోకి వచ్చేసింది. అదే.. కాదలి. కొత్త నటీనటులతో పట్టాభి అనే కొత్త దర్శకుడు రూపొందించిన ట్రయాంగిల్ లవ్ స్టోరీ ఇది. ‘రెస్పెక్ట్ హర్ చాయిస్’ అనే క్యాప్షన్ తో వస్తున్న ఈ సినిమా.. ట్రైలర్ తో బాగానే ఆకట్టుకుంది. ఈ చిత్ర దర్శకుడు పట్టాభి తెలంగాణ మంత్రి కేటీఆర్ మిత్రుడు కావడం విశేషం. కేటీఆర్ తో పాటు రామ్ చరణ్ ముఖ్య అతిథులుగా హాజరై ఆడియో రిలీజ్ చేయడంతో జనాలకు ఈ సినిమా వైపు దృష్టిమళ్లింది. ‘ఓయ్’ దర్శకుడు ఆనంద్ రంగా ఈ చిత్ర సమర్పకుడు కావడం విశేషం. ఈ చిన్న సినిమాకు పోటీగా ఓ తమిళ డబ్బింగ్ మూవీ కూడా వచ్చే శుక్రవారమే విడుదలవుతుంది. అదే.. మరకతమణి. తెలుగు కుర్రాడు ఆది పినిశెట్టి కథానాయకుడిగా నటించిన థ్రిల్లర్ మూవీ ఇది. ఓ మణి నేపథ్యంలో సాగుతుందీ సినిమా. శరవణన్ దర్శకుడు. ఈ చిత్రం తమిళ.. తెలుగు భాషల్లో ఒకేసారి విడుదల కానుంది.

Like Us on Facebook : https://www.facebook.com/Tupakidotcom/