మూడు వారాలు సూపర్.. మరి ఈ వారం?

గత రెండేళ్లూ సంక్రాంతి సినిమాల సందడి మామూలుగా లేదు. పోయినేడాది మూడు సినిమాలు.. అంతకుముందు ఏడాది మూడు సినిమాలు మంచి విజయం సాధించాయి. కానీ ఈసారి మాత్రం సంక్రాంతి వెలవెలబోయింది. ‘అజ్ఞాతవాసి’ డిజాస్టర్ కావడంతో సంక్రాంతికి సగం కళ పోయింది. ‘జై సింహా’ ఏదో ఓ మోస్తరుగా ఆడగా.. ‘గ్యాంగ్’ సోసోగా నడిచింది. ‘రంగుల రాట్నం’ అడ్రస్ లేకుండా పోయింది. మొత్తంగా సంక్రాంతి సగటు సినీ ప్రేక్షకుడిని నిరాశకే గురి చేసింది. కానీ రిపబ్లిక్ డే వీకెండ్ నుంచి మళ్లీ బాక్సాఫీస్ కు కళ వచ్చింది. ఆ వారాంతంలో వచ్చిన ‘భాగమతి’ అంచనాల్ని మించి విజయం సాధించి ప్రేక్షకుల్ని అలరించింది. అప్పట్నుంచి ప్రతి వారం బాక్సాఫీస్ కళకళలాడుతోంది.

తర్వాతి వారంలో రెండు సినిమాలు రిలీజవ్వగా.. ‘టచ్ చేసి చూడు’ తుస్సుమనిపించినప్పటికీ ‘ఛలో’ ఆకట్టుకుంది. ఆ సినిమాకు కూడా అంచనాల్ని మించే వసూళ్లు వచ్చాయి. సూపర్ హిట్ రేంజికి చేరిందా సినిమా. ఇక గత వారం మూడు సినిమాలు రిలీజైతే ‘ఇంటిలిజెంట్’.. ‘గాయత్రి’ తేలిపోయాయి. కానీ ‘తొలి ప్రేమ’ మాత్రం మంచి టాక్.. ఓపెనింగ్స్ తో దూసుకెళ్లింది. ఈ సినిమా పెద్ద హిట్టయ్యే దిశగా సాగుతోంది. ఇలా గత మూడు వారాంతాలూ ఒక్కో సూపర్ హిట్ తో బాక్సాఫీస్ దగ్గర సందడి కనిపించింది. మరి ఈ వీకెండ్లో ఏమవుతుందో చూడాలి. ఈ శుక్రవారం నాని నిర్మాణంలో తెరకెక్కిన ‘అ!’తో పాటుగా మంజుల దర్శకురాలిగా మారి తీసిన ‘మనసుకు నచ్చింది’ రిలీజవుతున్నాయి. ఇందులో ఒకటి థ్రిల్లర్ లాగా కనిపిస్తుంటే.. ఇంకోటి రొమాంటిక్ లవ్ స్టోరీలా ఉంది. మరి ఈ రెండింట్లో ప్రస్తుత టాలీవుడ్ సక్సెస్ స్ట్రీక్ ను కొనసాగించే సినిమా ఏదో మరి?