సినిమాటోగ్రాఫర్లను భయపెడుతున్న హీరోలు

ఇటీవల తెలుగు హీరోలతో కలిసి పనిచేసేందుకు హడలెత్తిపోతున్నారట సీనియర్ సినిమాటోగ్రాఫర్లు. టాలీవుడ్ హీరో సెంట్రిక్ ఇండస్ట్రీ కావడంతో, టాప్ హీరోల దగ్గర నుంచి రెండు మూడు హిట్లు కొట్టిన చోటా మోటా హీరోలు వరకు వారు పాండిందే పాట ఆడిందే ఆట అనే రీతిన పరిశ్రమ పరిస్థితి నెలకొంది. అయితే గతంలో ఈ సెగ కేవలం నిర్మాతల్ని, దర్శకుల్ని మాత్రమే ఇబ్బంది పెట్టేది కానీ పులస ఇలసైనట్లు హీరోల మోనార్కిజానికి ఇప్పుడు సినిమాటోగ్రాఫర్లు కూడా బలైపోతున్నారని సమాచారం. తాజాగా విడుదలైన ఓ మెగా హీరో సినిమాకి ముందుగా బాలీవుడ్ నుంచి సినిమాటోగ్రాఫర్ ను దిగుమతి చేసుకున్నారు.

షూటింగ్ చివరి దశకు వచ్చేసరికి ఆ బాలీవుడ్ సినిమాటోగ్రాఫర్ కు, హీరోకి మధ్య వివాదాలు తలెత్తడంతో, ఆ బాలీవుడ్ సినిమాటోగ్రాఫర్ సినిమాని మధ్యలోనే వదిలేసి వెళ్లిపోయాడు. దీంతో చేసేదేమి లేక టాలీవుడ్ కి చెందిన ఓ స్టార్ సినిమాటోగ్రాఫర్ మిగిలిన వర్క్ పూర్తి చేశాడు. ఇదే సీన్ ఇప్పుడు ఆ స్టార్ హీరో తమ్ముడు సినిమా విషయంలో కూడా రిపీట్ అవుతోంది. అన్న బాలీవుడ్ నుంచి సినిమాటోగ్రాఫర్ ను రప్పిస్తే తమ్ముడు మల్లూవుడ్ నుంచి ఓ సినిమాటోగ్రాఫర్ ను తీసుకొచ్చాడు.

సినిమా మొదలై షూటింగ్ జరుగుతున్న టైమ్ లో ఆ మళయాలీ సినిమాటోగ్రాఫర్ కి - హీరోకి వివాదాలు వచ్చాయట. దీంతో ఆ మల్లూ సినిమాటోగ్రాఫర్ ని కొచిన్ కి పంపేసి, ఆ ప్లేస్ లోకి తన అన్నగారి సినిమాని గట్టెక్కించిన ఆ స్టార్ సినిమాటోగ్రాఫర్ తమ్ముడుని సినిమాటోగ్రాఫర్ గా తీసుకున్నాడట ఆ కుర్ర హీరో. ఇది ఇక్కడితో ఆగిపోలేదు తాజాగా వరసు విజయాలు అందుకుంటున్న ఓ యంగ్ హీరో నెక్ట్స్ మూవీ విషయంలో కూడా సినిమాటోగ్రాఫర్లు మారారు. మరి ఈ మార్పులు రాను రాను ఎంతవరకు వెళతాయో చూడాలి.