కొత్త పోస్ట‌ర్ల ధ‌మాకా

ప్ర‌తియేటా కొత్త సంవ‌త్స‌ర వేడుక‌ల్లో టాలీవుడ్ ట్రీట్ త‌ప్ప‌నిస‌రి. ఈసారి సెల‌బ్రిటీలంతా కుటుంబ స‌మేతంగా డిసెంబ‌ర్‌ 31 మిడ్ నైట్ సెల‌బ్రేష‌న్స్ తో చిలౌట్ చేశారు. కొంద‌రు ఇళ్ల‌లోనే ఈ వేడుక‌లు జ‌రుపుకుంటే - మ‌రికొంద‌రు బంధు మిత్రుల్ని ఇంటికి ఆహ్వానించి పార్టీలు చేసుకున్నారు. ఇంకొంద‌రు విదేశాల‌కు వెళ్లి అక్క‌డ ఉన్న బంధుమిత్రుల‌తో సెల‌బ్రేష‌న్స్ సాగించారు. అదంతా అటుంచితే కొత్త సంవ‌త్స‌రాన్ని పుర‌స్క‌రించుకుని తెలుగు రాష్ట్రాల అభిమానుల కోసం అప్ క‌మ్ రిలీజెస్ కి సంబంధించిన కొత్త లుక్ ల‌ను వ‌దిలింది టాలీవుడ్. నిన్న‌టి నుంచి ఇప్ప‌టివ‌ర‌కూ తామ‌ర తంప‌ర‌గా ఒకటొక‌టిగా బోలెడ‌న్ని పోస్ల‌ర్లు రిలీజ‌య్యాయి.

వీటిలో మెగాప‌వ‌ర్ స్టార్ రామ్ చ‌ర‌ణ్ న‌టించిన `విన‌య విధేయ రామ` - సూప‌ర్‌ స్టార్ మ‌హేష్ న‌టిస్తున్న `మహ‌ర్షి` పోస్ట‌ర్లు లైవ్‌ లోకి వ‌చ్చి అభిమానుల్లో ఫుల్ జోష్‌ ని నింపాయి. త‌మ అభిమాన స్టార్ల‌ను చాలా కొత్త‌గా కొత్త గెట‌ప్పుల్లో చూశామ‌ని అభిమానులు మురిసిపోతున్నారు. చ‌ర‌ణ్ ఫ‌క్తు ఫ్యామిలీ మ్యాన్ గా క‌నిపించాడు. పైగా సంక్రాంతి పండ‌గ తెచ్చినంత ప‌ల్లె ప‌ట్టు కుర్రాడిలా పంచె క‌ట్టుతో త‌ళుక్కుమ‌న్నాడు. అన్న‌లు వ‌దిన‌ల‌తో సెల‌బ్రేష‌న్ మోడ్ లో ఉన్న చ‌ర‌ణ్ మైమ‌రిపించాడు. అందుకు పూర్తి కాంట్రాస్ట్ లుక్ తో మ‌హేష్ బిగ్ స‌ర్‌ప్రైజ్ ఇచ్చారు. మ‌హేష్ అల్ట్రా మోడ్ర‌న్ సోగ్గాడిలా, శ్రీ‌మంతుడిలా.. సూటు బూటు వేసిన శోభ‌న్‌ బాబులా ద‌ర్శ‌న‌మిచ్చారు. వీళ్ల‌కు తోడు ఈ సంక్రాంతి బ‌రిలోనే రిలీజ్ కి వ‌స్తున్న `ఎన్టీఆర్ బ‌యోపిక్‌` పోస్ట‌ర్లు ఆస‌క్తి రేకెత్తించాయి. క‌థానాయ‌కుడు భోజ‌నాల ఫోటో - బ‌స‌వ‌తార‌కం ఫోటో లైవ్ లీనెస్ తో ఆక‌ట్టుకున్నాయి. అలాగే మెగాస్టార్ చిరంజీవి స‌హా ప‌లువురు టాలీవుడ్ స్టార్లు న‌టిస్తున్న సినిమాల‌ పోస్ట‌ర్ల‌తో ఓ కేర‌ళ అభిమాని రూపొందించిన కొత్త సంవ‌త్స‌రం క్యాలెండ‌ర్ మైమ‌రిపిస్తోంది.

మ‌మ్ముట్టి- మ‌హి.వి.రాఘ‌వ్ ల వైయ‌స్సార్ `యాత్ర‌`కు సంబంధించిన శుభాకాంక్ష‌లు పోస్ట‌ర్ ఆక‌ట్టుకుంది. కొంత గ్యాప్ త‌ర్వాత గ‌జిని సూర్య బ‌రిలో దిగుతున్నాడు. అత‌డు న‌టిస్తున్న సూర్య 37 త్వ‌ర‌లో రిలీజ్ కి రానుంది. ఈ సినిమాకి కాప్పాన్ అనే టైటిల్‌ ని ప్ర‌క‌టించారు. త‌మిళ పోస్ట‌ర్ ఆక‌ట్టుకుంది. సూర్య గ‌న్ చేత‌ప‌ట్టి కార్పొరెట్ గురూలా - గ్యాంగ్ స్ట‌ర్ లా కొత్త‌ లుక్ లో క‌నిపించాడు. క‌ళ్యాణ్ రామ్ - 118 న్యూలుక్ ఇంప్రెస్సివ్. 2017 క‌ళ్యాణ్ రామ్ లో ఎంత మార్పు తెచ్చిందో చూశాం. టెంప‌ర్ నుంచి అత‌డిలో స్టైల్ కంటెంట్ మారిపోయింది. అంత‌కంత‌కు గ్రిప్ పెంచుకుని కొత్త అవ‌తారంతో అద‌ర‌గొట్టేస్తున్నాడు. 118 లుక్ చాలా పెప్పీగా - ఎంతో స్టైలిష్ గా క‌నిపిస్తున్నాడు క‌ళ్యాణ‌రాముడు. సూప‌ర్ స్టార ర‌జ‌నీ కాంత్ స్టైల్ గురించి ప్ర‌స్థావించాల్సిన ప‌నేలేదు. ఆయ‌న న‌టించిన పేట (పెట్టా) ఈ సంక్రాంతి బ‌రిలోనే త‌మిళ్ - తెలుగులో రిలీజ‌వుతోంది. తాజా గా కార్తీక్ సుబ్బ‌రాజు టీమ్ కొత్త పోస్ట‌ర్ ని పంపింది. విక్ట‌రీ వెంక‌టేష్ - వ‌రుణ్ తేజ్ న‌టిస్తున్న `ఎఫ్ 2 - ఫ‌న్ & ఫ్ర‌స్టేష‌న్` ఆడియోకి ఇప్ప‌టికే మంచి మార్కులే ప‌డ్డాయి. ఓ రెండు పాట‌లు మాస్ లో మోతెక్కుతున్నాయి. రాక్ స్టార్ దేవీశ్రీ తెచ్చిన కొత్త ఊపు ఇది. ఇక‌పోతే ఈ సినిమా కొత్త పోస్ట‌ర్ ని రిలీజ్ చేశారు. మిల్కీ వైట్ బ్యూటీ త‌మ‌న్నా- ద‌టీజ్ మ‌హాల‌క్ష్మి పోస్ట‌ర్ ఆక‌ట్టుకుంది. తాజాగా బెల్లంకొండ కొత్త సంవ‌త్స‌రం శుభాకాంక్ష‌లు పోస్ట‌ర్ ని రివీల్ చేసింది యూనిట్. బెల్లంకొండ కొత్త సంవ‌త్స‌రంలో కొత్త ప్ర‌ణాళిక‌ల‌తో మెప్పిస్తాడేమో చూడాలి. ఇక అక్కినేని కాంపౌండ్ - నంద‌మూరి కాంపౌండ్ హీరోలకు సంబంధించి.. మొన్న‌ క్రిస్మ‌స్ నుంచి ఎప్ప‌టిక‌ప్పుడు కొత్త పోస్ట‌ర్లు వ‌స్తూ మైమ‌రిపిస్తూనే ఉన్నాయి. వింక్ గాళ్ ప్రియా వారియ‌ర్ `ల‌వ‌ర్స్ డే` పోస్ట‌ర్ కొత్త ఏడాది ట్రీట్ తో మైమ‌రిపించింది. ఇంకా బోలెడ‌న్ని పోస్ట‌ర్లు నేడు లైవ్ లోకి రానున్నాయి.