ధ‌నుష్ పీరియాడిక్ యాక్ష‌న్ డ్రామాలో తెలుగు హీరో!

విభిన్న‌మైన సినిమాల‌తో హీరోగా త‌మిళ్ తో పాటు తెలుగులోనూ మంచి గుర్తింపుని సొంతం చేసుకున్నారు త‌మిళ హీరో ధ‌నుష్. ప్ర‌స్తుతం వ‌రుస ప్రాజెక్ట్ లలో న‌టిస్తూ బిజీగా వున్న ధ‌నుష్ ఇదే ఏడాది 'సార్‌' మూవీతో తెలుగులో స్ట్రెయిట్ సినిమా చేస్తున్న విష‌యం తెలిసిందే. వెంకీ అట్లూరి డైరెక్ట్ చేస్తున్న ఈ మూవీని సితార ఎంట‌ర్ టైన్ మెంట్స్‌, ఫార్చూన్ ఫోర్ సినిమాస్ బ్యాన‌ర్ ల‌పై సూర్య‌దేవ‌ర నాగ‌వంశీ, సాయి సౌజ‌న్య నిర్మిస్తున్నారు.

తెలుగులో సార్ పేరుతో రూపొందుతున్న ఈ మూవీ త‌మిళంలో 'వాతి'గా వ‌స్తోంది. ఇదిలా వుంటే సెప్టెంబ‌ర్ 29న ధ‌నుష్ న‌టించిన లేటెస్ట్ మూవీ 'నానే వ‌రు వేన్‌'ని తెలుగులో 'నేనే వ‌స్తున్నా' పేరుతో గీతా ఆర్ట్స్ తో క‌లిసి క‌లైపులి ఎస్ ధాను రిలీజ్ చేస్తున్నారు.

సెల్వ‌రాఘ‌వ‌న్ చాలా కాలం త‌రువాత డైరెక్ట్ చేసిన ఈ మూవీలో ధ‌నుష్ హీరోగా, విల‌న్ గా రెండు భిన్న‌మైన పాత్ర‌లో ద్విపాత్రాభిన‌యం చేశాడు. సైక‌లాజిక‌ల్ యాక్ష‌న్ థ్రిల్ల‌ర్ గా రూపొందిన ఈ మూవీపై తెలుగులోనూ మంచి అంచ‌నాలున్నాయి.

ఇదిలా వుంటే అరుణ్‌ మాధేశ్వ‌ర‌న్ ద‌ర్శ‌క‌త్వంలో ట్రూ ఈవెంట్స్ నేప‌థ్యంలో 1960 పీరియ‌డ్ లో జ‌రిగిన కొన్ని సంఘ‌ట‌న‌ల‌ని తీసుకుని ధ‌నుష్ హీరోగా 'కెప్టెన్ మిల్ల‌ర్' అనే మూవీ తెర‌కెక్కుతోంది. ధ‌నుష్ కెరీర్ లోనే మాసీవ్ బ‌డ్జెట్ తో స‌త్య‌జ్యోతి ఫిలింస్ ఈ మూవీని నిర్మిస్తోంది. జీవీ ప్ర‌కాష్ సంగీతం అందిస్తున్న ఈ మూవీని వ‌చ్చే ఏడాది స‌మ్మ‌ర్ లో భారీ స్థాయిలో రిలీజ్ చేయాల‌ని ప్లాన్ చేస్తున్నారు.

ఈ మూవీకి సంబంధించిన కీల‌క అప్ డేట్ ని చిత్ర బృందం శ‌నివారం సాయంత్రం విడుద‌ల చేయ‌బోతున్న‌ట్టుగా సోష‌ల్ మీడియా వేదికగా ప్ర‌క‌టించింది. అయితే తాజా స‌మ‌చారం ప్ర‌కారం ఈ మూవీలో తెలుగు హీరో సందీప్ కిష‌న్ కీల‌క పాత్ర‌లో క‌నిపించ‌బోతున్నార‌ని తెలిసింది. ఇదే విష‌యాన్ని అధికారికంగా చిత్ర బృందం శనివారం సాయంత్రం ప్ర‌క‌టించేసింది. వెల్క‌మ్ అంటూ ఓ పోస్ట‌ర్ ని కూడా విడుద‌ల చేసింది.

సందీప్ కిష‌న్ ప్ర‌స్తుతం 'మైఖేల్‌' పేరుతో రూపొందుతున్న పాన్ ఇండియా మూవీలో న‌టిస్తున్నాడు. విజ‌య్ సేతుప‌తి ఇందులో కీల‌క పాత్ర‌లో క‌నిపించ‌బోతున్నాడు. ప్ర‌స్తుతం ఈ మూవీ చిత్రీక‌ర‌ణ ద‌శ‌లో వుంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.