స్టార్ హీరో బైక్ రైడింగ్.. షాక్ లో ఫ్యాన్స్!

సౌత్ స్టార్ హీరో తలా అజిత్ పేరు వినగానే.. హీరోనే కాదు ఓ బైక్ రేసర్‌ కూడా మనకు గుర్తొస్తాడు. బైక్ రైడింగ్ అంటే ప్రాణంగా ఇష్టపడే అజిత్ ఎప్పటికప్పుడు కొత్త కొత్త రేస్ బైకులపై సవారీ చేస్తుంటారు. ఇటీవల అజిత్ ఏకంగా 650 కిలోమీటర్లు ఒంటరిగా బైక్ రైడ్ చేసి వార్తల్లో నిలిచాడు. హైదరాబాద్ నుంచి చెన్నై వరకు సాగిన ఈ జర్నీకి సంబంధించిన ఫొటోలు సోషల్ మీడియాలో వెలుగులోకి వచ్చాయి. స్టార్ డైరెక్టర్ శివ దర్శకత్వంలో వరుసగా నాలుగు సక్సెస్ ఫుల్ సినిమాలను తన ఖాతాలో వేసుకున్నాడు. తరువాత బాలీవుడ్‌ సూపర్‌ హిట్ పింక్‌ సినిమాను రీమేక్‌ చేసిన అజిత్ మరో హిట్‌ అందుకున్నాడు. ప్రస్తుతం ఈ స్టార్ హీరో హెచ్‌. వినోద్ దర్శకత్వంలో వాలిమై అనే సినిమాలో నటిస్తున్నాడు. ఈ సినిమా షూటింగ్ లాక్‌ డౌన్‌ ముందు వరకు హైదరాబాద్‌ లోనే జరిగింది. బైక్‌ రేసింగ్‌ నేపథ్యంలో కీలక సన్నివేశాలను చిత్రీకరించారట.

అయితే ఈ చిత్రీకరణలో వాడిన బైక్‌ అజిత్ కి ఎంతో నచ్చటంతో ఆ బైక్‌ మీదే హైదరాబాద్‌ నుంచి చెన్నై వరకు వెళ్లాడట. అయితే ఎవరికీ తెలియకుండా సైలెంట్‌ గా వెళ్ళిపోయిన అజిత్ జర్నీకి సంబంధించిన ఫోటోలు తాజాగా బయటకు రావటంతో అభిమానులు ఆశ్చర్యపోతున్నారు. దాదాపు 650 కిలోమీటర్లు అజిత్ బైక్‌ మీద ప్రయాణించినట్టుగా చిత్రయూనిట్ వెల్లడించారు. ఈ ప్రయాణంలో కేవలం పెట్రోల్ కోసం - ఫుడ్ కోసం మాత్రమే రెండు మూడు సార్లు బ్రేక్‌ తీసుకున్నాడట అజిత్. ఇక సెట్స్‌ మీద ఉన్న వాలిమై సినిమా షూటింగ్ చాలా వరకు పూర్తయ్యిందట. ఈ సినిమాను నవంబర్‌లో రిలీజ్ చేసేందుకు ప్లాన్ చేశారట చిత్రయూనిట్‌. కానీ ప్రస్తుతం లాక్‌ డౌన్‌ కారణంగా అన్ని కార్యక్రమాలు ఆగిపోవటంతో రిలీజ్‌ వాయిదా పడే అవకాశం ఉందని భావిస్తున్నారు.