అనిరుధ్‌ ను తప్పించడంతో ఛాలెంజ్‌ గా తీసుకున్నా!

తాజాగా బాక్సాఫీస్‌ ముందుకు వచ్చిన ‘అరవింద సమేత’ చిత్రంకు సూపర్‌ హిట్‌ టాక్‌ వచ్చింది. ప్రేక్షకులతో పాటు విమర్శకులు కూడా ప్రశంసలు కురిపించారు. ఈ చిత్రంలోని ఎన్టీఆర్‌ నటన, త్రివిక్రమ్‌ డైరెక్షన్‌, జగపతిబాబు పాత్ర తర్వాత అంతా ఎక్కువగా చెప్పే మాట తమన్‌ సంగీతం. ఈ చిత్రానికి మొదట సంగీత దర్శకుడిగా అనిరుధ్‌ ను ఎంపిక చేయడం జరిగింది. ఆ సమయంలోనే అజ్ఞాతవాసి విడుదలై ఫ్లాప్‌ అవ్వడంతో పాటు, సంగీతం పై విమర్శలు వచ్చాయి. దాంతో ఎన్టీఆర్‌ ఈ చిత్రానికి అనిరుధ్‌ వద్దన్నాడని, దాంతో తమన్‌ ను త్రివిక్రమ్‌ లైన్‌ లోకి తీసుకు వచ్చాడనే టాక్‌ వినిపించింది.

తాజాగా సినిమా విడుదలైన తర్వాత ఎన్టీఆర్‌ తీసుకున్న నిర్ణయం సరైనదే అని, ఈ చిత్రానికి అనిరుధ్‌ అయితే ఈ స్థాయి న్యాయం చేసేవాడేమో కాదని, తమన్‌ పూర్తి న్యాయం చేశాడంటూ అభిమానులు అభిప్రాయం వ్యక్తం చేశారు. సినిమా సక్సెస్‌ నేపథ్యంలో సంగీత దర్శకుడు తమన్‌ మీడియాతో మాట్లాడుతూ ఆసక్తికర విషయాలను చెప్పుకొచ్చాడు.

తమన్‌ మాట్లాడుతూ.. అనిరుధ్‌ మంచి సంగీత దర్శకుడు, అతడి ట్యాలెంట్‌ పై నమ్మకంతో త్రివిక్రమ్‌ మొదట ఆయన్ను తీసుకున్నారు. కాని కొన్ని కారణాల వల్ల అనిరుధ్‌ ఈ సినిమా నుండి తప్పుకోవాల్సి వచ్చింది. నాకు త్రివిక్రమ్‌ నుండి కాల్‌ వచ్చిన సమయంలో అనిరుధ్‌ తో మాట్లాడాను, తను ఏం పర్వాలేదు చేసేయ్‌ అన్నట్లుగా సమాధానం ఇచ్చాడు. తాజాగా సినిమా విడుదలైన తర్వాత కూడా అనిరుధ్‌ నాకు కాల్‌ చేసి అభినందనలు తెలిపాడు.

అనిరుధ్‌ ను తప్పించి నాకు ఛాన్స్‌ ఇచ్చినప్పుడు ఒక ఛాలెంజ్‌ గా తీసుకుని మరీ అరవింద సమేత చిత్రాన్ని చేశాను, త్రివిక్రమ్‌ గారి నుండి ఫుల్‌ సపోర్ట్‌ నాకు దక్కింది. పూర్తి స్వేచ్చ ఇచ్చి మరీ నాతో వర్క్‌ చేయించుకున్నారంటూ తమన్‌ పేర్కొన్నాడు. త్రివిక్రమ్‌ అద్బుతమైన రచయిత, ఆయన కలం నుండి అక్షరాలు కాకుండా బుల్లెట్లు బయటకు వస్తాయి. ఆయనతో వర్క్‌ చేయడం గొప్ప అనుభూతి. ప్రస్తుతం రవితేజ, వరుణ్‌ తేజ్‌ ల మూవీలకు వర్క్‌ చేస్తున్నట్లుగా తమన్‌ పేర్కొన్నాడు.