సర్కారు వారి పాట పై అంచనాలు పెంచేస్తున్న థమన్‌

సూపర్ స్టార్‌ మహేష్‌ బాబు.. కీర్తి సురేష్‌ జంటగా పరశురామ్‌ దర్శకత్వంలో రూపొందుతున్న సర్కారు వారి పాట నుండి మొదటి పాట ప్రేక్షకుల ముందుకు వచ్చేందుకు సిద్దం అయ్యింది. ఇప్పటికే పాటలతో పాటు సినిమా కూడా ప్రేక్షకుల ముందుకు వచ్చి ఉండాలి. కాని కరోనా బ్యాక్ టు బ్యాక్‌ వేవ్స్ తో మహేష్ బాబు అభిమానుల సహనానికి పరీక్ష పెట్టింది. కరోనా థర్డ్‌ వేవ్‌ వల్ల మళ్లీ ఆలస్యం అవుతున్న సర్కారు వారి పాట సినిమా నుండి రాబోతున్న మొదటి పాట అభిమానులకు కాస్త సాంత్వన కలిగిస్తుందనే నమ్మకం వ్యక్తం అవుతోంది. సర్కారు వారి పాట సినిమా చిత్రీకరణ మొదలు పెట్టినప్పటి నుండి కూడా థమన్‌ ఈ సినిమా కోసం ఎలాంటి పాటలు ఇస్తాడా అంటూ అంతా ఆసక్తిగా ఎదురు చూస్తున్నారు. ఎట్టకేలకు ఆ సమయం రానే వచ్చింది. మొదటి పాటను ఈ నెల 14న ప్రేమికుల రోజు సందర్బంగా విడుదల చేయబోతున్నారు.

ఇప్పటికే ఫిబ్రవరి 14న మొదటి పాటను విడుదల చేయబోతున్నట్లుగా థమన్ నుండి ప్రకటన వచ్చింది. ఇప్పుడు మరో సారి సర్కారు వారి పాట మొదటి సింగిల్ అంచనాలు పెంచే విధంగా థమన్‌ సోషల్‌ మీడియా లో పోస్ట్‌ పెట్టాడు. తన స్టైలిష్ లుక్‌ ఫొటోను షేర్‌ చేసిన థమన్‌.. ఫిబ్రవరి వచ్చేసింది మీ అందరు ఎంత ఎగ్జైట్‌ తో ఉన్నారో నాకు తెలుసు. సర్కారు వారి పాట మొదటి పాట కోసం మీతో పాటు నేను కూడా చాలా ఆసక్తిగా ఉన్నానంటూ చెప్పుకొచ్చాడు. పాట కోసం థమన్‌ ఈ లుక్ లో షూట్ లో పాల్గొన్నట్లుగా తెలుస్తోంది. పాట మేకింగ్ వీడియో తో పాటు సింగర్స్ మరియు టెక్నీషియన్ ను కూడా ఈ మద్య లిరికల్‌ వీడియోలో చూపించడం కామన్‌ విషయం అయ్యింది. కనుక థమన్‌ తనను తాను సర్కారు వారి పాట మొదటి లిరికల్‌ వీడియోలో ఇలా స్టైలిష్ గా ప్రజెంట్‌ చేయబోతున్నట్లుగా అనిపిస్తుంది. థమన్‌ ఈ సినిమాను అత్యంత ప్రతిష్టాత్మకంగా తీసుకున్నాడు. అందుకే సర్కారు వారి పాట మ్యూజికల్‌ గా బ్లాస్ట్‌ అవ్వడం ఖాయం అని అబిమానులు నమ్మకంతో ఉన్నారు.

మహేష్ బాబు మరియు థమన్‌ ల కాంబో లో ఇప్పటికే మంచి మ్యూజికల్‌ హిట్స్ వచ్చాయి. కనుక ఈ సినిమా మరో మ్యూజికల్‌ హిట్ గా నిలుస్తుంది అనడంలో సందేహం లేదు. ఇక థమన్‌ విషయానికి వస్తే ఈమద్య కాలంలో ఆయన టాలీవుడ్ లో మోస్ట్‌ సక్సెస్ ఫుల్‌ మ్యూజిక్ డైరెక్టర్ గా పేరు దక్కించుకున్నాడు. 2020 సంవత్సరంలో అల వైకుంఠపురంలో సినిమా తో ఓ రేంజ్‌ లో రికార్డులను తన వశం చేసుకున్నాడు. ఆ తర్వాత కూడా ఈయన నుండి వచ్చిన సినిమాలు మ్యూజికల్‌ గా బ్లాక్ బస్టర్ గా నిలిచాయి. ఇటీవల వచ్చిన అఖండ సినిమా లోని పాటలు ముఖ్యంగా బ్యాక్ గ్రౌండ్‌ స్కోర్ థియేటర్లు దద్దరిల్లే లా చేసింది అనడంలో సందేహం లేదు. సర్కారు వారి పాట సినిమాకు కూడా అఖండ స్థాయిలో బీజీఎం ఇస్తాడనే నమ్మకంతో అభిమానులు ఉన్నారు. ఇటీవలే రాధేశ్యామ్‌ సినిమాకు కూడా థమన్‌ తో రీ రికార్డింగ్‌ చేయించారు. మొత్తానికి థమన్ పేరు మారు మ్రోగుతుంది. ఇలాంటి సమయంలో రాబోతున్న సర్కారు వారి పాట మొదటి సింగిల్ ఎలా ఉంటుందో చూడాలి.