తమన్.. అవి పైరసీ పాటలయ్యా సామీ

ఇప్పుడు అందరికంటే మ్యూజిక్ డైరక్టర్ తమన్ చాలా హ్యాపీగా ఉన్నాడు. ఎందుకంటే ఈ వారం మనోడి శ్రీరస్తు శుభమస్తు వస్తుంటే.. మరుసటి వారం తిక్క సినిమా వస్తోంది. రెండు సినిమాల్లోనూ ఓ 2-3 హిట్టు పాటలను అందించాడులే. వీటికి రివ్యూలు కూడా బాగానే వస్తున్నాయి. అందుకే ఇప్పడు తమన్ అంత హ్యాపీగా ఉండుంటాడు. ఇక చిరంజీవి తన 151వ సినిమా ఛాన్సు ఇస్తానని చెప్పేశారు కాబట్టి.. ఆ హ్యాపినెస్ కు లిమిటే లేదు.

ఈ ఎక్స్ యిట్మెంట్ లో తమన్ బాబు ఒక తప్పు చేస్తున్నాడు. ఈ రెండు సినిమాల్లోని పాటలను ఎవరు పొగిడినా.. పాటలను ఎవరు బాగున్నాయి అన్నా.. లిరిక్ ని పొగుడుతూ అద్భుతహా అంటూ ట్వీటు వేసినా కూడా.. వెంటనే వారి ట్వీట్లను రీ-ట్వీటు చేసి.. అభిమానుల కళ్ళలో ఆనందం చవిచూస్తూ.. ఆ పొగడ్తలను తను కూడా విని ఆనందిస్తున్నాడు. బాగానే ఉంది. అయితే కొందరు అభిమానులు ఏకంగా మ్యూజిక్ పైరసీ వెబ్ సైట్ల నుండి పాటలను డౌన్ లోడ్ చేసుకుని.. విని.. వాటిని ట్వీటు చేస్తుంటే.. మనోడు కూడా వాటిని చూసుకోకుండా రీ-ట్వీట్ చేస్తున్నాడు. స్వయంగా మ్యూజిక్ డైరక్టరే ఇలా పైరసీ సాంగ్స్ తాలూకు పోస్టర్లనూ లింకులను పబ్లిసైజ్ చేస్తే.. ఇంకేమన్నా ఉందా అసలు?

పాపం ఆనందంలో ఈ పైరసీ అనే లింక్ మర్చిపోయినట్లున్నాడు తమన్ భయ్యా. మనలో మన మాట.. ఈరోజుల్లో ఇలా పైరసీ వెబ్ సైట్లలో పాటలు డౌన్ లోడ్ చేసుకుని వినేవారే దాదాపు 80% ఉన్నారు. వాళ్లందరూ తమన్ ఎండార్స్మెంట్ చూసి ఆనందపడుతున్నారేమో!!