మరో రీమేక్ లో మిల్కీ?

మిల్కీ బ్యూటీగా పేరు గాంచిన తమన్నా కెరీర్ ప్రస్తుతం కొంత నెమ్మదించిన మాట వాస్తవమే. బాహుబలి2 లాంటి బ్లాక్ బస్టర్ లో నటించిన సంతృప్తి కూడా ఈమెకు దక్కలేదు. అయితే.. ప్రస్తుతం బాలీవుడ్ మూవీ క్వీన్ తెలుగు రీమేక్ లో నటిస్తున్న తమన్నా.. ఆ మూవీతో మళ్లీ బౌన్స్ బ్యాక్ అవుతానని నమ్మకంగా ఉంది.

ఇప్పుడీమె చేతికి మరో రీమేక్ వచ్చినట్లుగా తెలుస్తోంది. మూడేళ్ల క్రితం తమిళంలో వచ్చిన మూవీ జిగర్తాండా. సిద్ధార్ధ్.. బాబీ సింహా.. లక్ష్మీ మీనన్ లు నటించిన ఈ క్రైమ్ కామెడీ మూవీ సూపర్ సక్సెస్ అయింది. ఇప్పుడీ చిత్రాన్ని బాలీవుడ్ లో రీమేక్ చేయనుండగా.. ఆ ప్రాజెక్టులో నటించేందుకు తమ్మూకు ఆఫర్ వచ్చినట్లుగా తెలుస్తోంది. ఈ స్టోరీ.. కేరక్టర్ గురించి ముందే తెలిసిన తమన్నా.. ప్రస్తుతం దర్శక నిర్మాతలతో చర్చల్లో ఉన్నట్లు తెలుస్తోంది. గతంలో అజయ్ దేవగన్ తో కలిసి హిమ్మత్ వాలా రీమేక్ లో తమన్నా నటించగా.. ఇప్పుడు జిగర్తాండా రీమేక్ కు అజయ్ దేవగన్ నిర్మాతగా వ్యవహరించనుండడం విశేషం.

నిశికాంత్ కామత్ దర్శకత్వంలో ఈ రీమేక్ రూపొందనుండగా.. సంజయ్ దత్ కీలక పాత్రలో నటించబోతున్నాడు. బాలీవుడ్ కి తగినట్లుగా స్క్రిప్ట్ లో పలు మార్పులు చేయగా.. తమన్నా ఇంకా అగ్రిమెంట్స్ పై సంతకం చేయలేదని తెలుస్తోంది. అయితే.. బాలీవుడ్ నుంచి అందిన ఆఫర్ కావడంతో.. తమన్నా ఈ సినిమాను కాదనుకునే అవకాశాలు పెద్దగా లేవని టాక్.