ఆ లెజెండ్ 1000వ సినిమా వచ్చేస్తోంది

డైరెక్టర్ బాల అంటే తమిళ ప్రేక్షకులకు మాత్రమే కాదు.. పరిశ్రమ జనాలకు కూడా ఎంతో గౌరవం. పెద్ద దర్శకులు కూడా అతడికి చాలా రెస్పెక్ట్ ఇస్తారు. బాలక కంటే సీనియర్ డైరెక్టర్లు కూడా అతణ్ని ‘బాల సార్’ అని పిలుస్తారు. ‘సేతు’ దగ్గర్నుంచి అతను అలాంటి సినిమాలు తీశాడు మరి. బాల చివరి సినిమా ‘పరదేశి’ కూడా విమర్శకుల ప్రశంసలందుకుంది. అంతర్జాతీయ చిత్రోత్సవాల్లో ప్రదర్శితమైంది.

సమాజంలోని అణగారిన వర్గాల గురించి.. చీకటి కోణాల గురించి.. తన సినిమాల్లో తనదైన శైలిలో చర్చిస్తాడు బాల. మనం జీర్ణించుకోలేని అనేక విషయాల్ని తన సినిమాల్లో చూపిస్తాడు బాల. కొందరికి అతడి సినిమాలు అదో రకంగానూ అనిపిస్తాయి కానీ.. వాటిని విపరీతంగా అభిమానించే ప్రేక్షకులు కూడా తమిళనాట పెద్ద ఎత్తున ఉన్నారు. బాల కొత్త సినిమా ‘తారై తార్పటై’ మీద కూడా ఆ వర్గం ప్రేక్షకుల్లో భారీ అంచనాలే ఉన్నాయి.

సంక్రాంతికి విడుదల కాబోతున్న ఈ చిత్రం ట్రైలర్ నూతన సంవత్సర కానుకగా విడుదల చేశాడు బాల. ఎప్పట్లాగే ఇందులోనూ బాల ముద్ర స్పష్టంగా కనిపిస్తోంది. వీధి డ్యాన్సులు చేసే వాళ్ల జీవితాల నేపథ్యంలో తెరకెక్కిన సినిమాలా అనిపిస్తోంది. సంగీతానికి బాగా ప్రాధాన్యమున్నట్లు కూడా కనిపిస్తోంది. ఇది ఇళయరాజాకు సంగీత దర్శకుడిగా 1000వ సినిమా కావడం విశేషం. ట్రైలర్లో బ్యాగ్రౌండ్ స్కోర్ చూస్తేనే ఇళయరాజా ముద్ర స్పష్టంగా కనిపిస్తోంది. శశికుమార్ హీరోగా నటిస్తున్న ఈ సినిమాలో శరత్ కుమార్ తనయురాలు వరలక్ష్మి ఓ సెన్సేషనల్ క్యారెక్టర్ చేస్తోంది. ట్రైలర్లో ఆమే బాగా హైలైట్ అయ్యింది కూడా.