బాలయ్యతో అలా ఆ సినిమా ఆగిపోయిందట!

టాలీవుడ్ సీనియర్ దర్శకులలో కోడి రామకృష్ణకి ఒక ప్రత్యేకత ఉండేది. సినిమా రంగంలోకి అడుగుపెట్టిన దగ్గర నుంచి చివరి రోజుల వరకూ సినిమాను గురించి తప్ప ఆయన మరో విషయాన్ని గురించిన ఆలోచన చేయలేదు. అప్పట్లో దాసరి నారాయణరావు .. రాఘవేంద్రరావు తరువాత ఎక్కువగా వినిపించిన పేరు ఆయనదే .. ఎక్కువ సక్సెస్ లను అందుకున్నది ఆయనే.

గ్రామీణ నేపథ్యంలోని కథలను .. కుటుంబ కథాచిత్రాలను తెరకెక్కించడంలో ఆయన తరువాతనే ఎవరైనా. తెలుగు సినిమాకి గ్రాఫిక్స్ ను పరిచయం చేసింది ఆయనే అనడంలో సందేహం లేదు.

చాలామంది స్టార్స్ కి కోడి రామకృష్ణ భారీ విజయాలను అందించారు. తక్కువ బడ్జెట్ లోనే మంచి అవుట్ పుట్ తీసుకుని రావడం .. చెప్పిన సమయానికి ప్రాజెక్టును పూర్తి చేయడం ఆయన ప్రత్యేకతగా చెబుతుంటారు. లవ్ .. యాక్షన్ .. ఎమోషన్ .. కామెడీ .. ఇలా అన్ని రసాలు తన సినిమాలో సమపాళ్లుగా ఉండేలా ఆయన జాగ్రత్తలు తీసుకునేవారు. తెలుగులో ఆయన అందరి స్టార్స్ తో సినిమాలు చేసినప్పటికీ , వరుసగా సూపర్ హిట్లు ఇచ్చింది మాత్రం బాలయ్యకే అని చెప్పడం అతిశయోక్తి కాదు.

బాలయ్య - కోడి రామకృష్ణ కాంబినేషన్లో మంగమ్మగారి మనవడు .. ముద్దుల మావయ్య .. ముద్దుల కృష్ణయ్య .. ముద్దుల మేనల్లుడు .. మువ్వగోపాలుడు .. బాలగోపాలుడు .. వంటి సినిమాలు కనిపిస్తాయి. ఆ తరువాత కూడా ఆయన బాలయ్యతో ఎస్.

గోపాల్ రెడ్డి నిర్మాణంలో ఒక సినిమాను మొదలుపెట్టారు. అయితే ఆ సినిమా మాత్రం పూర్తి కాలేదు. కోడి రామకృష్ణ కూతురు దివ్య ... నిర్మాతగా మారిన సంగతి తెలిసిందే. అప్పట్లో బాలయ్యతో కోడి రామకృష్ణ సినిమా ఆగిపోవడాన్ని గురించిన ప్రశ్నకి తాజా ఇంటర్వ్యూలో ఆమె స్పందించింది.

ఈ సినిమా బడ్జెట్ కారణంగా ఆగిపోయిందనే వార్తలు అప్పట్లో వచ్చాయి .. కానీ అందులో ఎంతమాత్రం నిజం లేదు. గోపాల్ రెడ్డిగారి కుటుంబ సంబంధమైన కారణాల వలన ... ఆయన అనారోగ్య కారణాల వలన ఆ సినిమా పూర్తికాలేదు. ఆ సినిమా ఇంకా 25 శాతం షూట్ చేస్తే పూర్తవుతుందనగా అలా జరిగింది. ఆయన కోలుకున్న తరువాత పూర్తి చేయాలని చూశారుగానీ కుదరలేదు. అప్పట్లోనే అది చాలా పెద్ద బడ్జెట్ సినిమా .. ఫిల్మ్ సిటీలో భారీ సెట్స్ కూడా వేశారు .. పూర్తయి ఉంటే బాగుండేది" అంటూ చెప్పుకొచ్చింది.