'గాడ్ ఫాద‌ర్‌'లో పూరీ రోల్ అదేన‌ట‌..!?

మెగాస్టార్ చిరంజీవి హీరోగా మోహ‌న్ రాజా ద‌ర్శ‌క‌త్వంలో రూపుదిద్దుకుంటున్న సినిమా 'గాడ్ ఫాద‌ర్‌'. మ‌ల‌యాళంలో సూప‌ర్ డూప‌ర్ హిట్ గా నిలిచిన 'లూసిఫ‌ర్‌'కు ఇది రీమేక్‌. చిరంజీవి ఇమేజ్ కు, తెలుగు నెటివిటీకి త‌గ్గ‌ట్లుగా స్క్రిప్ట్ లో ప‌లు మార్పులు, చేర్పులు చేసి మోహ‌న్ రాజా ఈ చిత్రాన్ని తెర‌కెక్కిస్తున్నారు. ఇందులో చిరంజీవి చెల్లెలు పాత్ర‌లో లేడీ సూప‌ర్ స్టార్ న‌య‌నతార న‌టిస్తుండ‌గా.. ఆమె భ‌ర్త పాత్ర‌ను వ‌ర్సిటైన్ యాక్ట‌ర్ స‌త్య‌దేవ్ చేస్తున్నాడు.

అలాగే బాలీవుడ్ కండ‌ల వీరుడు స‌ల్మాన్ ఖాన్‌, స్టార్ యాంక‌ర్ అన‌సూయ కీల‌క పాత్ర‌ల‌ను పోషిస్తున్నారు. ప్ర‌స్తుతం శ‌ర‌వేగంగా షూటింగ్ జ‌రుపుకుంటున్న ఈ చిత్రంలో డేరింగ్ & డ్యాషింగ్ డైరెక్ట‌ర్ పూరీ జ‌గ‌న్నాథ్ కూడా క‌నిపించ‌బోతున్నారు.

ఇటీవ‌లె పూరీ ఈ మూవీ షూటింగ్‌లో జాయిన్ అవ్వ‌గా.. చిరంజీవి ఆయ‌న‌కు ప్ర‌త్యేకంగా ఆహ్వానం ప‌లికారు. ఇందుకు సంబంధించిన ఫొటోలు సైతం నెట్టింట వైర‌ల్ అయ్యాయి.

అయితే పూరీ జ‌గ‌న్నాథ్ ఎలాంటి పాత్ర‌లో న‌టిస్తార‌నేది ఇప్పుడు అందరిలోనూ ఆస‌క్తిని రేకెత్తిస్తుంది. ఇలాంటి త‌రుణంలో ఆయ‌న‌ రోల్ కు సంబంధించి ఓ న‌యా అప్డేట్ బ‌య‌ట‌కు వ‌చ్చింది.

అదేంటంటే.. గాడ్ ఫాద‌ర్‌లో పూరీ ఓ జ‌ర్న‌లిస్ట్ పాత్ర‌లో క‌నిపించ‌బోతున్నార‌ట‌. ఒక విధంగా సినిమాను డ్రైవ్ చేసే పాత్ర ఇది. ఒరిజినల్ వెర్ష‌న్‌లో ఈ పాత్ర‌ను పృధ్విరాజ్ అన్న ఇంద్రజిత్ పోషించాడు. రీమేక్ లో ఈ రోల్ ను పూరీ చేయ‌బోతున్నాడ‌ని జోరుగా ప్ర‌చారం జ‌రుగుతోంది. మ‌రి ఇది ఎంత వ‌ర‌కు నిజ‌మో త్వ‌ర‌లోనే క్లారిటీ రానుంది.

కాగా, రాజ‌కీయ నేప‌థ్యంలో రూపొందుతున్న ఈ చిత్రాన్ని శ్రీమతి సురేఖ కొణిదెల సమర్పణలో కొణిదెల ప్రొడక్షన్ కంపెనీ, సూపర్ గుడ్ ఫిల్మ్స్‌, ఎన్‌వీఆర్ ఫిల్మ్స్ బ్యానర్ల‌పై ఆర్బీ చౌదరి, ఎన్వీ ప్రసాద్ నిర్మిస్తున్నారు. త‌మ‌న్ సంగీత ద‌ర్శ‌కుడిగా వ్య‌వ‌హ‌రిస్తున్నారు. స‌గానికి పైగా చిత్రీక‌ర‌ణ‌ను పూర్తి చేసుకున్న ఈ చిత్రం ఆగ‌స్టులో విడుద‌ల అయ్యే అవ‌కాశాలు ఉన్నాయి.