కొత్త సినిమా మొదలెట్టిన అల్లరోడు..!

అల్లరి నరేష్ కొన్నేళ్లపాటు వెండితెర‌పై త‌న‌దైన హాస్యంతో తెలుగు ప్రేక్షకులను అలరించారు. కేవలం కామెడీ చిత్రాలకే పరిమితం కాకుండా.. పంథా మార్చుకొని ప్రయోగాత్మక సినిమాలతోనూ ఆకట్టుకున్నారు. చాలా కాలం తర్వాత ఇటీవల 'నాంది' సినిమాతో సూపర్ హిట్ అందుకున్నారు నరేష్. విజయ్ కనకమేడల దర్శకత్వం వహించిన ఈ చిత్రం విమర్శకులను సైతం మెప్పించింది.

దీంతో కథల ఎంపికలో అచితూచి అడుగులు వేస్తున్న అల్లరోడు.. కంటెంట్ ఓరియెంటెడ్ చిత్రాలకు ప్రాధాన్యం ఇస్తున్నారు. ప్రస్తుతం 'సభకు నమస్కారం' అనే సైటిరికల్ పొలిటికల్ థ్రిల్లర్ లో నటిస్తున్నారు. మల్లంపాటి సతీష్ ఈ సినిమాతో దర్శకుడిగా ఇండస్ట్రీకి పరిచయం అవుతున్నాడు. ఈ క్రమంలో తాజాగా అల్లరి నరేష్ తన 59వ చిత్రాన్ని ప్రకటించారు.

#Naresh59 చిత్రాన్ని మంగళవారం పూజా కార్యక్రమాలతో లాంఛనంగా ప్రారంభించారు. ఈ వేడుకలో హీరోహీరోయిన్లతో పాటుగా మిగతా చిత్ర బృందం పాల్గొన్నారు. ఈ విషయాన్ని సోషల్ మీడియా వేదికగా వెళ్ళడించిన అల్లరి నరేష్.. అందరూ ఆదరించే ఒక కొత్త కథతో ఈ సినిమా తెరకెక్కుతుందని పేర్కొన్నారు. అలానే ముహుర్తపు సన్నివేశానికి సంబంధించిన ఫోటోలను షేర్ చేశారు.

ఈ చిత్రంలో 'అల్లరి' నరేష్ సరసన తెలుగమ్మాయి ఆనంది హీరోయిన్ గా నటించనుంది. ఎ.రాజ మోహన్ ఈ సినిమాకి దర్శకత్వం వహించనున్నారు. జీ స్టూడియోస్ సమర్పణలో హాస్య మూవీస్ బ్యానర్ పై రాజేష్ దండా ఈ చిత్రాన్ని నిర్మించనున్నారు. శ్రీచరణ్ పాకాల సంగీతం సమకూర్చనున్నారు.

#Naresh59 చిత్రానికి అబ్బూరి రవి మాటలు రాస్తున్నారు. రామ్ రెడ్డి సినిమాటోగ్రాఫర్ గా.. చోటా కె ప్రసాద్ ఎడిటర్ గా వర్క్ చేయనున్నారు. బ్రహ్మ కడలి ఆర్ట్ డైరెక్టర్ గా వ్యవహరించనున్నారు. సినిమాకు సంబంధించిన ఇతర నటీనటుల వివరాలు తర్వాత వెల్లడిస్తారు. వీలైనంత త్వరలో ఈ సినిమా రెగ్యులర్ షూటింగ్ ప్రారంభించనున్నట్లు చిత్ర బృందం తెలిపింది.