సాయి తేజ్ వదిలిన 'ది బర్త్ 10000 బీసీ' ట్రైలర్..!

మానవుడి పుట్టుకకు మూలం, 10000 బీసీ కాలం నాటి మానవ జీవన విధానం తదితర అంశాలతో తెరకెక్కిన అడ్వెంచర్ థ్రిల్లర్ ''ది బర్త్ 10000 బీసీ''. డా. విక్రమ్ దర్శకత్వం వహించిన ఈ చిత్రంలో రానా ప్రతాప్ ప్రధాన పాత్రలో నటించారు. తెలుగు తమిళ కన్నడ ఇంగ్లీష్ భాషలో ఈ సినిమాని రిలీజ్ చేయనున్నారు. ఇప్పటికే ఈ చిత్రం నుంచి విడుదలైన టీజర్ కు విశేష స్పందన లభించింది. ఈ క్రమంలో తాజాగా 'ది బర్త్ 10000 BC' ట్రైలర్ ను సుప్రీమ్ హీరో సాయి తేజ్ సోషల్ మీడియా వేదికగా విడుదల చేశారు. ఈ సినిమా ట్రైలర్ ను విడుదల చేసినందుకు సంతోషంగా ఉందని.. ట్రైలర్ అద్భుతంగా ఉందని.. చిత్ర బృందానికి అభినందనలు అని సాయి తేజ్ ఈ సందర్భంగా ట్వీట్ చేశారు.

'ది బర్త్ 10000 బీసీ' మూవీ ట్రైలర్ విషయానికొస్తే ఆద్యంతం ఆసక్తికరంగా సాగింది. ఇందులో మనిషి పుట్టుక.. మానవ పరిణామ క్రమం.. అప్పటి జీవన విధానం తెలియజేస్తూ ఆకట్టుకునే సన్నివేశాలు సాహసాలను చూపించారు. మనిషి బ్రతకడానికి అవసరమైన తిండి కోసం అతని వేట ఎలా సాగిందనేది ఈ సినిమాలో చెప్పబోతున్నట్లు ఈ ట్రైలర్ ను చూస్తే అర్థమవుతుంది. దీనికి మ్యూజిక్ డైరెక్టర్ జుడా శాండీ సమకూర్చిన బ్యాగ్రౌండ్ స్కోర్ బాగుంది. అలానే సినిమాటోగ్రాఫర్ ఆనంద్ సుందరేశ అందించిన విజువల్స్ హాలీవుడ్ చిత్రాన్ని గుర్తు చేస్తున్నాయి. మహేష్ తొగట ఈ చిత్రానికి ఎడిటింగ్ వర్క్ చేస్తున్నారు. మొత్తం మీద ఇండియన్ సినిమాలో సరికొత్త కాన్సెప్ట్ తో వస్తున్న ఈ సినిమా ట్రైలర్ అద్భుతంగా ఉంది. శ్రీ వినాయక మారుతి క్రియేషన్స్ - లక్ష ప్రొడక్షన్స్ బ్యానర్లపై ప్రదీప్ జైన్ ఈ చిత్రాన్ని నిర్మిస్తున్నారు. త్వరలో 'ది బర్త్ 10000 బీసీ' సినిమా ప్రేక్షకుల ముందుకు రానుంది.