థియేటర్స్ లో దుమ్మురేపనున్న బ్లాక్ బస్టర్ 'భూమ్‌ బద్దల్' సాంగ్..!

మాస్ మహారాజ్ ర‌వితేజ‌ లేటెస్ట్ మూవీ 'క్రాక్' సంక్రాంతి కానుకగా జనవరి 9 నుంచి థియేటర్స్ లో సందడి చేయనుంది. ఈ చిత్రాన్ని ప్రపంచ వ్యాప్తంగా 1000 కి పైగా స్క్రీన్స్ లో రిలీజ్ చేస్తున్నారు. ఇది రవితేజ కెరీర్ లోనే బిగ్గెస్ట్ రిలీజ్ అని చెప్పవచ్చు. గోపిచంద్ మలినేని దర్శకత్వం వహించిన ఈ చిత్రాన్ని సరస్వతి ఫిలిం డివిజన్ బ్యానర్‌ పై ఠాగూర్ మధు నిర్మించారు. మరో రెండు రోజుల్లో ప్రేక్షకుల ముందుకు రానున్న ఈ చిత్రానికి సంబంధించిన ప్రమోషనల్ కార్యక్రమాల స్పీడ్ పెంచారు. బుధవారం గ్రాండ్ గా ప్రీ రిలీజ్ ఈవెంట్ ని నిర్వహించారు. ఇప్పటికే ప్రచార చిత్రాలతో సినిమాపై పాజిటివ్ బజ్ క్రియేట్ చేసిన చిత్ర యూనిట్ తాజాగా 'భూమ్‌ బద్దల్' సాంగ్ ఫ్రేమ్స్ విడుదల చేసింది.

'క్రాక్' నుంచి విడుదలైన 'భూమ్‌ బద్దలు.. భూమ్‌ బద్దలు‌.. నా ముద్దుల సౌండు' అంటూ సాగే మాస్ ఆడియన్స్ ని ఉర్రూతలూగిస్తోంది. మ్యూజిక్ డైరెక్టర్ థమన్ స్వరపరిచిన ఈ మాస్ బీట్ కి రామ‌జోగ‌య్య శాస్త్రి క్యాచీ లిరిక్స్ అందించాడు. సింగ‌ర్స్‌ సింహా - మంగ్లీ ఈ పాటను మాంచి హుషారుగా ఆల‌పించారు. దీనికి తగ్గట్టే జానీ మాస్టర్‌ ఈ పాటకు మాస్ స్టెప్పులు కంపోజ్ చేశాడు. ఈ సాంగ్ లో రవితేజ సరసన అందాల అప్సర రాణి కాలు కదిపింది. జీకే విష్ణు విజువల్స్ ఆకట్టుకుంటున్నాయి. ఈ బ్లాక్ బస్టర్ సాంగ్ లో ఇద్దరి ఎనర్జీ రేపు థియేటర్స్ లో ‘భూమ్‌ బద్దల్’ కొట్టనుంది.‌

వాస్త‌వ సంఘ‌ట‌న‌ల ఆధారంగా రూపొందిన 'క్రాక్' చిత్రంలో రవితేజ పవర్‌ ఫుల్ పోలీసర్ పాత్రలో కనిపించనున్నాడు. శృతి హాస‌న్ హీరోయిన్ గా నటించగా.. సముద్రఖని - వరలక్ష్మీ శరత్ కుమార్ కీలక పాత్రలు పోషించారు. 'డాన్ శీను' 'బలుపు' వంటి సూపర్ హిట్స్ తర్వాత రవితేజ - గోపిచంద్ మలినేని కాంబినేషన్ లో వస్తున్న ఈ చిత్రంపై భారీ అంచనాలే ఉన్నాయి. 'క్రాక్' సినిమా స్యూర్ షాట్ హిట్ అవుతుందని చిత్ర యూనిట్ ధీమాగా ఉంది. మాస్ మహారాజ్ 'క్రాక్' థియేటర్స్ లో ఏ మాత్రం సౌండ్ చేస్తుందో చూడాలంటే మరో రెండు రోజులు ఆగాల్సిందే.