ఈసారి క్రిస్మస్ బరిలో దిగుతున్న క్రేజీ చిత్రాలివే..!

టాలీవుడ్ లో దసరా - దీపావళి సీజన్లలో పెద్ద హీరోలు మరియు మీడియం రేంజ్ సినిమాలు థియేటర్లలో సందడి చేశాయి. మిగిలిన వారాల్లో చిన్నా చితక చిత్రాలు రిలీజ్ అయ్యాయి. అయితే పాజిటివ్ టాక్ వచ్చిన సినిమాలకు కూడా జనాల నుంచి ఆశించిన స్పందన రాకపోవడంతో.. మరికొన్ని క్రేజీ చిత్రాలను వాయిదా వేసుకుంటున్నారు. సంక్రాంతికి పెద్ద చిత్రాలు ఉండటంతో.. నేరుగా ఫిబ్రవరికి వెళ్లిపోతున్నారు. అయితే ఈ మధ్యలో క్రిస్మస్ పండుగకు పేరున్న హీరోల చిత్రాలు రాబోతున్నాయి.

మాస్ మహారాజా రవితేజ నటిస్తున్న ''ధమాకా'' చిత్రాన్ని క్రిస్మస్ స్పెషల్ గా.. డిసెంబర్ 23న విడుదల చేయడానికి మేకర్స్ సన్నాహాలు చేస్తున్నారు. త్రినాథరావు నక్కిన దర్శకత్వంలో తెరకెక్కుతున్న ఈ మాస్ అండ్ యాక్షన్ ఎంటర్టైనర్ లో రవితేజ సరసన శ్రీలీల హీరోయిన్ గా నటించింది. పీపుల్ మీడియా ఫ్యాక్టరీ మరియు అభిషేక్ అగర్వాల్ ఆర్ట్స్ సంస్థలు సంయుక్తంగా ఈ చిత్రాన్ని నిర్మించాయి. 'ఖిలాడి' - 'రామారావు ఆన్ డ్యూటీ' వంటి రెండు ఫ్లాప్స్ తర్వాత రాబోతున్న ఈ సినిమాపై రవితేజ ఆశలు పెట్టుకున్నారు.

యంగ్ హీరో నిఖిల్‌ సిద్దార్థ్ నటించిన ''18 పేజెస్'' చిత్రాన్ని కూడా డిసెంబరు 23న థియేటర్లలోకి తీసుకురాబోతున్నట్లు నిర్మాతలు ఇటీవల ప్రకటించారు. స్టార్ డైరెక్టర్‌ సుకుమార్‌ కథ - స్క్రీన్‌ ప్లే అందించిన ఈ సినిమాకి పల్నాటి సూర్య ప్రతాప్ దర్శకత్వం వహించారు. సుకుమార్ రైటింగ్స్ తో కలిసి జీఏ2 పిక్చర్స్ బ్యానర్ పై ఈ చిత్రాన్ని నిర్మిస్తున్నారు. ఇందులో అనుపమ పరమేశ్వరన్ హీరోయిన్ గా నటించింది. 'కార్తికేయ-2' వంటి బ్లాక్ బస్టర్ తర్వాత నిఖిల్ నుంచి రాబోతున్న ఈ రొమాంటిక్ ఎంటర్టైనింగ్ పై అందరిలో అంచనాలు నెలకొన్నాయి.

సంతోష్ శోభన్ హీరోగా నందినీ రెడ్డి దర్శకత్వంలో తెరకెక్కుతున్న ''అన్నీ మంచి శకునములే'' చిత్రాన్ని కూడా క్రిస్మస్ కు రిలీజ్ చేయనున్నట్లు మేకర్స్ అనౌన్స్ చేశారు. డిసెంబరు 21న ఈ లవ్ అండ్ ఫ్యామిలీ ఎంటర్టైనర్ ప్రేక్షకుల ముందుకి రానుంది. స్వప్న సినిమాస్ బ్యానర్ పై ఈ సినిమా రూపొందుతోంది. ఇందులో సంతోష్ శోభన్ సరసన మాళవిక నాయర్ హీరోయిన్ గా నటిస్తోంది.

యాక్షన్ హీరో విశాల్ నటించిన తమిళ డబ్బింగ్ మూవీ "లాఠీ" కూడా క్రిస్మస్ రిలీజుల జాబితాలోకి వచ్చి చేరింది. వినోద్ కుమార్ దర్శకత్వంలో తెరకెక్కిన ఈ హై ఆక్టేవ్ యాక్షన్ ఎంటర్టైనర్ ని పాన్ ఇండియా స్థాయిలో తెలుగు, తమిళ్, హిందీ, మలయాళం, కన్నడ భాషల్లో డిసెంబరు 22న విడుదల చేయబోతున్నట్లు ప్రకటించారు.

నిజానికి ‘లాఠీ’ చిత్రాన్ని సెప్టెంబర్ 15నే విడుదల చేయాలని ప్లాన్ చేసినప్పటికీ.. పరిస్థితులు అనుకూలించకపోవడంతో వాయిదా వేసుకున్నారు. ఇప్పుడు క్రిస్మస్ కు ప్రేక్షకుల ముందుకి తీసుకురావాలని నిర్ణయించుకున్నారు. రమణ - నంద సంయుక్తంగా నిర్మించిన ఈ చిత్రంలో విశాల్ సరసన సునయన హీరోయిన్‌ గా నటించింది. చాలా కాలంగా తెలుగులో సరైన విజయాన్ని అందుకోడానికి ట్రై చేస్తున్న విశాల్.. లాఠీ మీద చాలా హోప్స్ పెట్టుకున్నారు.

మామూలుగా క్రిస్మస్ ను సినిమాలకు మంచి సీజన్ గా భావిస్తుంటారు. కానీ కరోనా పాండమిక్ తర్వాత ఏ సినిమాలను ఎప్పుడు ఆదరిస్తారో చెప్పలేకున్నాం. ఇలాంటి పరిస్థితుల్లోనూ గతేడాది 'పుష్ప 1' మూవీ బాక్సాఫీస్ వద్ద భారీ వసూళ్లు రాబట్టింది. ఇప్పటికైతే 2022 క్రిస్మస్ ను టార్గెట్ చేస్తూ నాలుగు సినిమాలు రాబోతున్నట్లు డేట్లు ఇచ్చారు. మరికొన్ని చిన్న సినిమాలు కూడా రేసులోకి వచ్చే అవకాశం వుంది. మరి వీటిల్లో ఏవేవి విజయం సాధిస్తాయో చూడాలి.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.