ఈవెంట్ ఆర్గనైజేషన్ వారికి మొదటికే మోసం వచ్చింది...!

సౌత్ ఇండియాలో అతి పెద్ద ఈవెంట్ మేనేజ్మెంట్ అని చెప్పుకొనే ఓ ఈవెంట్ ఆర్గనైజేషన్ వారు ఇప్పుడు తలనొప్పులు కొని తెచ్చిపెట్టున్నారని ఇండస్ట్రీలో కామెంట్స్ వినిపిస్తున్నాయి. టాలీవుడ్ లో సినీ ఈవెంట్స్ ఆర్గనైజ్ చేస్తూ సదరు ఈవెంట్ మేనేజ్మెంట్ మంచి పేరు తెచ్చుకుంది. సినిమాకి సంబంధించిన ఏ ఈవెంట్ ఉన్నా ఫస్ట్ వారి వద్దకే వెళ్లే స్థాయికి చేరుకుంది. అయితే ఇటీవల ఓ స్టార్ డైరెక్టర్ తో క‌లిసి సినిమాల విడుదల విషయంలో కొత్త పద్ధ‌తి తీసుకురావడంతో చాలా మంది ప్రొడ్యూసర్స్ వీరిపై కోపంగా ఉన్నారట. దీనికి తోడు ఆ డైరెక్టర్ తీస్తున్న కాంట్రవర్సీ మూవీ కార్యరూపం దాల్చడానికి కూడా సదరు ఈవెంట్ ఆర్గనైజేషన్ వారే బ్యాక్ ఎండ్ లో ప్రోత్సహం అందించారని ఇండస్ట్రీలో టాక్ వినిపిస్తోంది.

కాగా వివాదాస్పద టైటిల్ తో తెరకెక్కిన ఆ సినిమా కూడా వారే విడుదల చేయాల్సి ఉండగా.. ఓ వర్గం సినీ అభిమానుల నుండి వ్యతిరేఖత రావడంతో ఆ సినిమా రిలీజ్ చేసే ఆలోచన విరమించుకున్నారని కామెంట్స్ చేస్తున్నారు. దీంతో స్టార్ హీరో ఫ్యామిలీకి క్లోజ్ గా ఉండే కొంతమంది మేకర్స్ సదరు ఈవెంట్ ఆర్గనైజేషన్ వారికి ఈవెంట్స్ ఇవ్వకూడదనే నిర్ణయానికి వచ్చేశారట. అంతేకాకుండా ఆ ఫ్యామిలీ హీరోలతో పాటు వారిని ఫాలో అయ్యే హీరోలు కూడా ఈ ఆర్గనైజేషన్ వారిని దూరం పెట్టాలని డిసైడ్ అయ్యారట. ఈ నేపథ్యంలో వారికి మొదటికే మోసం వచ్చిందని.. అందుకే దీని నుంచి బయట పడటం కోసం ఆ డైరెక్టర్ కి కౌంటర్ గా తీస్తున్న సినిమాలను తామే రిలీజ్ చేస్తామని ముందుకొస్తున్నారని ఇండస్ట్రీ వర్గాల్లో గుసగుసలు వినిపిస్తున్నాయి. మరి రాబోయే రోజుల్లో ఎలాంటి పరిణామాలు సంభవించబోతున్నాయో చూడాలి.