అభిమానికి ఐ ల‌వ్ యు చెప్పి షాకిచ్చింది

త‌మ ఫేవ‌రెట్ స్టార్ ని చూడ‌గానే ఎగ్జ‌యిట్ అయిపోవ‌డం అభిమానుల స‌హ‌జ స్వ‌భావం. త‌న‌ని క‌ల‌వ‌గానే ఫోటో దిగాల‌ని సెల్ఫీతో చిల్ అవ్వాల‌ని ఆరాట ప‌డుతుంటారు. ఒక్కోసారి అరిచి గోల చేస్తుంటారు. ఇంత‌కుముందు క‌లిస్తే దానిని గుర్తు చేసేందుకు కూడా కొంద‌రు ప్ర‌య‌త్నిస్తారు. బాలీవుడ్ స్టార్ హీరోయిన్ అలియా భట్ ని క‌ల‌వాల‌ని ఒక అభిమాని ఎగ్జ‌యిట్ అవ్వ‌డం క‌నిపించింది. సంగీత కచేరీలో క‌లిసిన అభిమాని.. అలియాకు తాను పెద్ద అభిమానిని అని త‌న‌ను ఇంతకు ముందు కలిశానని చెప్పినప్పుడు అలియా నుండి షాకింగ్ ఆన్స‌ర్ వచ్చింది. ఆ అభిమానిని తాను గుర్తించాన‌ని చెప్పింది. ఇది కచేరీలో ఉన్న అభిమానులతో పాటు వీక్షకులను పూర్తిగా ఆశ్చర్యపరిచింది.

గల్లీ బాయ్ న‌టీన‌టులు అలియా భట్ - రణవీర్ సింగ్ గుర్గావ్ లో జరిగిన రాపర్ ఏపీ ధిల్లాన్ సంగీత కచేరీకి హాజరయ్యారు. సంగీత కచేరీలో ఒక అభిమాని ఆలియా వైపు చూస్తూ కేకలు వేయడం వీడియోలో కనిపిస్తుంది. అలా పెగ్ సిప్ చేస్తున్న ఆలియా.. వెంటనే ఆమె వైపు చూసి ఫ్లయింగ్ కిస్ పంపింది. యే బహుత్ బడీ ఫ్యాన్ హై (ఆమె చాలా అభిమాని) అని ఆ అభిమాని స్నేహితుడు ఆ వీడియోలో నటికి చెప్పడం వినిపించింది. అభిమాని `ఐ లవ్ యు` అని అరిచారు. అలియా తిరిగి ``ఐ లవ్ యు టూ`` అని చెప్పింది. నేను మిమ్మల్ని గ‌తంలో క‌లిసాను అని అభిమాని వెల్ల‌డించ‌గా.. ఆలియా స్పందిస్తూ- ``నాకు తెలుసు.. నాకు నీ ముఖం గుర్తుంది``.. ఆ త‌ర్వాత ఆ తీపి జ్ఞాప‌కాన్ని అభిమాని కంటికి కునుకుప‌ట్ట‌నివ్వ‌ద‌న‌డంలో ఎలాంటి సందేహం లేదు. ప్ర‌స్తుతం ఆ వీడియో వైరల్ గా మారింది.

ఆలియా న‌టించిన తొలి సౌత్ పాన్ ఇండియా చిత్రం ఆర్.ఆర్.ఆర్ సంక్రాంతికి విడుద‌ల‌వుతున్న సంగ‌తి తెలిసిందే. అల్లూరి సీతారామ‌రాజు (చ‌ర‌ణ్‌) భార్య సీత‌గా క‌నిపిస్తుంది ఆలియా. త‌న‌దైన అందం చందం రూపంతో తెలుగు ఆడియెన్ కి స్పెష‌ల్ ట్రీట్ ఇవ్వ‌నుంది ఈ బ్యూటీ. రాజీ- గ‌ల్లీ బోయ్స్ లాంటి విల‌క్ష‌ణ చిత్రాల‌తో ఆక‌ట్టుకున్న ఆలియా ఆర్.ఆర్.ఆర్ లో మ‌రో వైవిధ్య‌మైన పాత్ర‌లో క‌నిపిస్తుంది. గంగూభాయి క‌తియావాడీ చిత్రంలో వేశ్యాగృహ నిర్వాహ‌కురాలు గంగూభాయిగా న‌టిస్తోంది. భ‌న్సాలీ ఈ చిత్రానికి ద‌ర్శ‌క‌త్వం వ‌హించారు. ఆలియా న‌టించిన బ్ర‌హ్మాస్త్ర కూడా విడుద‌ల‌కు సిద్ధ‌మ‌వుతోంది.