ట్రాఫిక్ రూల్స్ పాఠాలు చెప్తున్న హీరోయిన్

ప్రతి వాహణదారుడు కూడా సరిగ్గా ట్రాఫిక్ రూల్స్ పాటిస్తే సగం యాక్సిడెంట్స్ అనేవి తగ్గుతాయి అంటూ టాలీవుడ్ హీరోయిన్ అంజలి చెప్పుకొచ్చింది. ఇటీవల ఆమె నటించిన పవన్ కళ్యాణ్ వకీల్ సాబ్ మూవీ ప్రమోషన్ కోసం హైదరాబాద్ వచ్చిన అంజలి నగర పోలీసులు ఎంజే మార్కెట్ లో నిర్వహించిన ట్రాఫిక్ అవగాహన కార్యక్రమంలో పాల్గొంది. పోలీసువారు రూపొందించిన మూడు షార్ట్ ఫిల్మ్ లను అంజలి విడుదల చేశారు.

ఈ సందర్భంగా అంజలి మాట్లాడుతూ.. తాను ఎప్పుడు కూడా ట్రాఫిక్ రూల్స్ ను పాటిస్తాను. తన డ్రైవర్ కు కూడా విధిగా ట్రాఫిక్ రూల్స్ ను పాటించాలని సూచిస్తాను అంటూ చెప్పుకొచ్చింది. ట్రాఫిక్ రూల్స్ పాటించడం వల్ల మనతో పాటు అవతలి వారిని కూడా సేవ్ చేసిన వాళ్ళం అవుతామని అంజలి చెప్పుకొచ్చింది. ట్రాఫిక్ రూల్స్ ను ప్రతి ఒక్కరు విధిగా పాటిస్తూ ప్రమాదాలకు దూరంగా ఉండాలని అంజలి పిలుపునిచ్చింది. కొన్ని సినిమాల్లో పోలీసులను విలన్లు గా చూపిస్తారు. కానీ పోలీసులు నిజమైన హీరోలు అంటూ అంజలి అభిప్రాయం వ్యక్తం చేసింది. హైవేలపై జరిగే ప్రమాదాలకు అతి వేగం కారణం కనుక జాగ్రత్తగా నెమ్మదిగా వెళ్లాలని అంజలి వాహనదారులకు విజ్ఞప్తి చేసింది.