అడివి శేష్ మ‌ళ్లీ ఆ సంద‌డి తీసుకొస్తాడా?

ఆగ‌స్టులో విడుద‌లైన తెలుగు సినిమాలతో మ‌ళ్లీ టాలీవుడ్ లో సంద‌డి మొద‌లైన విష‌యం తెలిసిందే. నంద‌మూరి క‌ల్యాణ్ రామ్ న‌టించిన `బింబిసార‌`, దుల్క‌ర్ స‌ల్మాన్ హీరోగా రూపొందిన ఎపిక్ ల‌వ్ స్టోరీ `సీతారామం`, నిఖిల్ హీరోగా న‌టించిన `కార్తికేయ 2` చిత్రాలు బాక్సాఫీస్ వ‌ద్ద సూప‌ర్ హిట్‌.. బ్లాక్ బ‌స్ట‌ర్ టాక్ ని సొంతం చేసుకోవ‌డ‌మే కాకుండా బాక్సాఫీస్ వ‌ద్ద రికార్డు స్థాయి వ‌సూళ్ల‌ని సాధించి వ‌రుస ఫ్లాపుల్లో వున్న టాలీవుడ్ కు స‌రికొత్త ఉత్సాహాన్ని అందించాయి.

ఈ సినిమాలు అందించిన ఉత్సాహంతో మ‌రిన్ని సినిమాలు ప్రేక్ష‌కుల ముందుకొచ్చాయో కానీ ఆ స్థాయిలో మాత్రం ఆక‌ట్టుకోలేక‌పోవ‌డ‌మే కాకుండా ఆశించిన స్థాయి వ‌సూళ్ల‌ని కూడా రాబ‌ట్ట‌లేక‌పోయాయి. మ‌ళ్లీ ఆ స్థాయి వ‌సూళ్ల‌ని, టాక్ ని రాబ‌ట్టే సినిమాల కోసం యావ‌త్ టాలీవుడ్ మొత్తం ఆస‌క్తిగా ఎదురుచూస్తోంది. మ‌ధ్య‌లో శ‌ర్వా `ఒకే ఒక జీవితం`, మెగాస్టార్ న‌టించిన `గాడ్ ఫాద‌ర్` వంటి సినిమాలు విడుద‌లైనా టాక్ ని బ‌ట్టి వ‌సూళ్ల‌ని రాబ‌ట్ట‌లేక‌పోయాయి.

తొలి వారం ఆహా ఓహో అనిపించినా ఆ త‌రువాత సైలెంట్ అయిపోయాయి. ఇక ఇదే స‌మ‌యంలో స్ట్రెయిట్ సినిమాలు ఎలాంటి సౌండ్ లేకుండా సైలెంట్ అయిపోతే డ‌బ్బింగ్ సినిమాలు మాత్రం రికార్డు స్థాయి వ‌సూళ్ల‌ని రాబ‌డుతూ ట్రేడ్ వ‌ర్గాల‌ని విస్మ‌యానికి గురిచేశాయి. `గాడ్ ఫాద‌ర్‌` టైమ్ లో విడుద‌లైన `కాంతార‌` తెలుగులో ఏ స్థాయి సంచ‌ల‌నాలు సృష్టించిందో ప్ర‌త్యేకంగా చెప్పాల్సిన ప‌ని లేదు. ఈ సినిమా ధాటికి `గాడ్ ఫాద‌ర్‌` సైలెంట్ అయిపోయాడంటే ప‌రిస్థితిని అర్థం చేసుకోవ‌చ్చు.

ఈ మూవీ త‌రువాత వ‌చ్చిన `ఊర్వ‌శివో రాక్ష‌సివో` ఫ‌స్ట్ వీక్ హిట్ అనిపించుకున్నా ఆ స్థాయిలో వ‌సూళ్ల‌ని రాబ‌ట్ట‌లేక సెకండ్ వీక్ కే సైలెంట్ అయిపోయి షాకిచ్చింది. ఇక రీసెంట్ గా విడుద‌లైన చిన్న సినిమా `మ‌సూద‌` హిట్ టాక్ ని సొంతం చేసుకుని వ‌సూళ్ల ప‌రంగా ఫ‌ర‌వాలేద‌నిపిస్తోంది. సుడిగాలి సుధీర్ న‌టించిన `గాలోడు` కూడా మంచి వ‌సూళ్ల‌ని రాబ‌ట్ట‌డం విశేషం.

అయితే సూప‌ర్ హిట్టు బొమ్మ మాత్రం తెలుగు నుంచి ఆగ‌స్టు త‌రువాత థియేట‌ర్ల‌లో సంద‌డి చేయ‌లేదు. దీంతో ఇప్ప‌డు అంద‌రి దృష్టి అడివి శేష్ న‌టించిన `హిట్ 2`పై ప‌డింది. యాక్ష‌న్ థ్రిల్ల‌ర్ గా రూపొందిన ఈ మూవీని నేచుర‌ల్ స్టార్ నాని నిర్మించాడు. `హిట్ : ది ఫ‌స్ట్ కేస్‌` హిట్ అనిపించుకోవ‌డంతో అడివి శేష్ `హిట్ 2` పై అంచ‌నాలు నెల‌కొన్నాయి. ఇప్ప‌టికే విడుద‌లైన టీజ‌ర్ ఆస‌క్తిని రేకెత్తించ‌డంతో డిసెంబ‌ర్ 2న విడుద‌ల కానున్న ఈ మూవీతో మ‌ళ్లీ థియేట‌ర్ల‌లో సంద‌డి మొద‌ల‌వడం ఖాయం అని అంతా అంటున్నారు. అంద‌రు ఆశిస్తున్న‌ట్టుగానే అడివి శేష్ `హిట్ 2`తో టాలీవుడ్ లో మ‌ళ్లీ ఆ సంద‌డిని తీసుకొస్తాడా.. అన్న‌ది తెలియాలంటే డిసెంబ‌ర్ 2 వ‌ర‌కు వేచి చూడాల్సిందే.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.