ప్రమోషన్స్ ముమ్మరం చేస్తున్న నేచురల్ స్టార్.. తాజాగా మాటీవీలో అలా..!

నేచురల్ స్టార్ నాని నటించిన తాజా చిత్రం 'టక్ జగదీష్'. ఈ సినిమా విడుదలకు నెల రోజుల సమయం ఉండగానే చిత్రబృందం ప్రచార కార్యక్రమాలను ముమ్మరంగా ప్లాన్ చేసినట్లు తెలుస్తుంది. కోవిడ్ తర్వాత నాని నుండి థియేట్రికల్ రిలీజ్ అవుతున్న ఫస్ట్ సినిమా ఇదే. అందుకే టక్ జగదీష్ విషయంలో నాని మరియు చిత్రబృందం సినిమాని జనాల్లోకి తీసుకెళ్లడానికి విశ్వప్రయత్నాలు చేస్తున్నారు. ఫ్యామిలీ ఎంటర్టైనర్ గా తెరకెక్కిన ఈ సినిమా ఏప్రిల్ 23న గ్రాండ్ రిలీజ్ కాబోతుంది. ఈ నేపథ్యంలో ఇటీవలే చిత్రబృందం రాజమండ్రిలో 'పరిచయ వేడుక' నిర్వహించారు. అలాగే టక్ జగదీష్ సినిమా విషయంలో మరో మూడు భారీ ప్రమోషనల్ ప్రోగ్రాంస్ నిర్వహించనున్నట్లు తెలుస్తుంది. వారానికి ఒకటి చొప్పున 'టక్ జగదీష్' ప్రచార కార్యక్రమాలు మూడు డిఫరెంట్ ప్రాంతాలలో ప్లాన్ చేస్తున్నారట.

ఇదిలా ఉండగా.. నాని స్వయంగా తన సినిమాను ప్రమోట్ చేసేందుకు వివిధ టీవీ ప్రోగ్రాంలలో కూడా పాల్గొంటున్నాడు. తాజాగా నాని, హీరోయిన్ రితూవర్మ ఇద్దరూ కూడా మాటీవీ యాజమాన్యం నిర్వహించిన 'ఉగాది వేడుక' ప్రోగ్రాంలో మెరిసారు. ఇప్పటినుండి నాని వేరే టీవీ ఛానల్స్ లో కూడా డిఫరెంట్ ప్రమోషనల్ ప్రోగ్రాంస్ ప్లాన్ చేసాడట. అలాగే రేపు నాని.. టక్ జగదీష్ సినిమా గురించి మాట్లాడేందుకు ప్రెస్ మీట్ ఏర్పాటు చేయనున్నాడు. ఇప్పటికే సినిమా టీజర్ తో పాటలతో సినిమా పై మంచి బజ్ క్రియేట్ అయింది. ప్రేక్షకుల అంచనాలను మరింత పెంచేందుకు నాని బృందం ప్రమోషన్స్ పట్ల కేర్ తీసుకుంటున్నారు. షైన్ స్క్రీన్ బ్యానర్ పై రూపొందిన ఈ సినిమాకు శివ నిర్వాణ దర్శకత్వం వహించాడు. నాని - శివ కాంబినేషన్ లో వస్తున్న సెకండ్ మూవీ ఇది. ఈ సినిమాకు తమన్ సంగీతం అందిస్తున్నాడు.