నాని - శేష్ ల క్రేజీ వీడియో: 'హిట్ 2' సూపర్ హిట్ అంతే..!

నేచురల్ స్టార్ నాని సమర్పణలో వర్సటైల్ యాక్టర్ అడివి శేష్ కథానాయకుడిగా తెరకెక్కిన చిత్రం ''హిట్ 2''. శైలేష్ కొలను ఈ క్రైమ్ ఇన్వెస్టిగేటివ్ థ్రిల్లర్ కు దర్శకత్వం వహించారు. సినీ ప్రియులు ఎంతో ఆసక్తిగా ఎదురుచూస్తున్న ఈ సినిమా రిలీజ్ కు రెడీ అయింది. ఈ నేపథ్యంలో మేకర్స్ జోరుగా ప్రమోషన్స్ చేస్తున్నారు.

''హిట్ 2: ది సెకండ్ కేస్'' సినిమా నుంచి ఇప్పటికే విడుదలైన పాటలు మరియు టీజర్‌ కి అద్భుతమైన స్పందన వచ్చింది. ఈ క్రమంలో ఇప్పుడు ట్రైలర్ ని రిలీజ్ చేయడానికి చిత్ర బృందం రెడీ అయింది. నిర్మాత నాని మరియు హీరో అడివి శేష్‌ కలిసి తాజాగా ఓ ప్రమోషనల్ వీడియోతో 'HIT 2' ట్రైలర్ విడుదల తేదీని వెల్లడించారు.

'HIT 2' ట్రైలర్ అనౌన్స్ మెంట్ ని క్రేజీ వీడియోతో ప్రకటించారు. ఇందులో నాని మరియు అడివి శేష్ ఇద్దరూ సినిమా బిజినెస్ గురించి.. అలానే మూవీ ట్రైలర్ గురించి సంభాషించారు. రిలీజ్ డేట్ దగ్గర పడుతుందని శేష్ టెన్షన్ పడుతుండగా.. నాని మాత్రం చాలా కూల్ గా 'హిట్' సినిమా సూపర్ హిట్ అంటూ కూల్ గా సమాధానమిచ్చారు.

నైజాం - ఆంధ్రా - యుఎస్ఏ డిస్ట్రిబ్యూషన్ రైట్స్ గురించి శేష్ అడగ్గా.. అన్నీ అమ్ముడుపోయాయని నాని రిలాక్స్ గా చెప్పారు. తెలుగులో ఈ మధ్య ప్రాపర్ హిట్ లేదని శేష్ స్ట్రెస్ గా ఫీల్ అవుతుండగా.. నాని మాత్రం 'హిట్ 2' హిట్ అంటూ చాలా కాన్ఫిడెంట్ గా చెబుతున్నాడు.

పబ్లిక్ ఈ మధ్య ట్రైలర్ చూసే సినిమా హిట్టో కాదో చెప్పేస్తున్నారని శేష్ అంటుండగా.. తాను కూడా ట్రైలర్ చూసే చెప్తున్నానని నాని తెలిపారు. ట్రైలర్ చాలా బాగుందని.. అన్ని అంశాలు ఉన్నాయని చెబుతూ చివరికి, ఇద్దరూ 'HIT 2' ట్రైలర్ విడుదల తేదీని ప్రకటించారు. నవంబర్ 23న ట్రైలర్ రాబోతోందని పేర్కొన్నారు.

'హిట్ 2' ను జనాల్లోకి తీసుకెళ్లడానికి చిత్ర బృందం యునిక్ స్ట్రాటజీలతో ముందుకు వెళ్తున్నారని ఈ వీడియో చూసి చెప్పొచ్చు. ఇందులో నాని - శేష్ ల సంభాషణ ఆధారంగా, టీజర్ కంటే సినిమా ట్రైలర్ మరింత ఆకట్టుకునేలా ఉంటుందని స్పష్టమవుతోంది.

''HIT 2'' అనేది హిట్ వెర్స్ నుండి రాబోతున్న రెండవ సినిమా. విశ్వక్ సేన్ ప్రధాన పాత్రలో నటించిన హిట్ చిత్రం 'హిట్-ది ఫస్ట్ కేస్‌' కు సీక్వెల్ కావడంతో అందరి దృష్టిని ఆకర్షిస్తోంది. ఇంటెన్స్ ప్రమోషన్లతో మేకర్స్ ఆసక్తిని రెట్టింపు చేసున్నారు. మరి ఈ బుధవారం రాబోతున్న థియేట్రికల్ ట్రైలర్ ఎలా ఉంటుందో చూడాలి.

'హిట్: ది సెకండ్ కేస్' సినిమాలో హొమిసైడ్ ఇంటర్వెన్షన్ ఆఫీసర్ కృష్ణ దేవ్ అలియాస్ కేడీ పాత్రలో అడివి శేష్ కనిపించనున్నారు. మీనాక్షి చౌదరి హీరోయిన్ గా నటిస్తుండగా.. రావు రమేష్ - పోసాని కృష్ణ మురళి - తనికెళ్ల భరణి - శ్రీకాంత్ మాగంటి - కోమలి ప్రసాద్ తదితరులు ఇతర ముఖ్య పాత్రలు పోషిస్తున్నారు.

వాల్ పోస్టర్ సినిమా బ్యానర్ పై ప్రశాంతి తిపిర్నేని ఈ చిత్రాన్ని నిర్మిస్తున్నారు. జాన్ స్టీవర్ట్ ఎడూరి సంగీతం సమకూర్చగా.. ఎస్ మణికందన్ సినిమాటోగ్రఫీ నిర్వహించారు. గ్యారీ బీహెచ్ ఎడిటింగ్ వర్క్ చేశారు. ''హిట్ 2'' చిత్రాన్ని డిసెంబర్ 2న ప్రపంచ వ్యాప్తంగా విడుదల చేయనున్నారు.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.