2022లో కొత్త జర్నీ మొదలు పెట్టబోతుందట

తెలుగు ప్రేక్షకులకు అలా మొదలైంది అంటూ పరిచయం అయిన ముద్దుగుమ్మ నిత్యా మీనన్‌ గ్లామర్‌ షో కు నో చెబుతూనే తాను అనుకున్నట్లుగా నటిస్తూ చాలా సినిమాలు చేసింది. ఈ అమ్మడు తెలుగుతో పాటు తమిళం మలయాళం ఇంకా హిందీ సినిమాలు చేసింది. ఇన్ని సినిమాలు చేసినా కూడా ఈమె ఎప్పుడు హద్దులు మీరి శృంగార సీన్స్‌ గాని స్కిన్‌ షో గాని చేయలేదు. ఇండస్ట్రీలో అలాంటివి చేయకుంటే ఆఫర్లు రావడం కష్టం. కాని నిత్యామీనన్‌ చాలా సంవత్సరాలుగా సినిమాల్లో ఉంటూనే ఉంది.

ఈమద్య కాలంలో ఈ అమ్మడికి కాస్త ఆఫర్లు తగ్గాయి. దాంతో హీరోయిన్‌ గా కెరీర్‌ కు గుడ్‌ బై చెప్పే ప్రయత్నాల్లో ఉన్నట్లుగా తెలుస్తోంది. కొత్తగా సినిమాలకు కమిట్‌ అవ్వకుండా పాత సినిమాలనే పూర్తి చేసి 2022లో కొత్త జర్నీని మొదలు పెట్టబోతున్నట్లుగా నిత్యామీనన్‌ సన్నిహితుల వద్ద చెప్పుకొచ్చిందట. ప్రస్తుతం ఈ విషయం సినీ వర్గాల్లో మరియు ఆమె ఫ్యాన్స్‌ లో చర్చనీయాంశంగా ఉంది.

నిత్యామీనన్‌ కు దర్శకత్వం పై మొదటి నుండి కూడా చాలా ఆసక్తి ఉందట. అందుకే ఆ ఆసక్తితో కొన్ని కథలను కూడా సిద్దం చేసుకుని పెట్టుకుంది. ఈ ఖాళీ సమయంలో రెండు స్క్రిప్ట్‌ లను రెడీ చేసిన నిత్యా మీనన్‌ 2022లో ఆ సినిమాలను పట్టాలెక్కించేందుకు ఏర్పాట్లు చేస్తున్నట్లుగా పేర్కొంది. త్వరలోనే తను కమిట్‌ అయిన సినిమాలను పూర్తి చేసి తన దర్శకత్వంలో సినిమాకు ఏర్పాట్లు చేయాలనేది నిత్యామీనన్‌ ప్లాన్‌ గా తెలుస్తోంది. హీరోయిన్‌ గా తనకంటూ ప్రత్యేక గుర్తింపు దక్కించుకుని మెప్పించిన నిత్యామీనన్‌ దర్శకురాలిగా సక్సెస్‌ అయ్యేనా చూడాలి.