ట్రైలర్ టాక్: ఇంప్రెస్ చేయని ఆఫీసర్

నాగార్జున - రామ్ గోపాల్ వర్మ కాంబినేషన్ అనగానే గ్యారంటీగా గుర్తొచ్చేది శివ సినిమానే. ఆ తర్వాత వాళ్లిద్దరి కాంబినేషన్ లో మరో రెండు సినిమాలొచ్చినా ప్రేక్షకులకు శివ సినిమానే బాగా రిజిస్టరయిపోయింది. చాలా సంవత్సరాల తరవాత వీళ్లిద్దరి కాంబినేషన్ లో ఆఫీసర్ సినిమా వస్తోంది. ఆర్జీవీకి బాగా అలవాటయిన... అచ్చొచ్చిన ముంబయి మాఫియా బ్యాక్ గ్రౌండ్ గా ఈ సినిమా స్టోరీ నడుస్తుంది.

జూన్ 1న ఆఫీసర్ థియేటర్లలో కనిపించనున్నాడు. దీంతో పవర్ ఆఫ్ ఆఫీసర్ పేరిట ఈ సినిమా ట్రయిలర్ వదిలారు. ఆఫీసర్ సినిమాకు సంబంధించి ఇప్పటికే రెండు మూడు టీజర్లు ఇచ్చారు. వాటన్నింటిని కలిపి మిక్స్ చేసి ట్రయిలర్ గా ప్రేక్షకుల ముందుకు తెచ్చారు. టీజర్ చూపించిన దానికే ఒకట్రెండు సీన్లు యాడ్ చేసి యాక్షన్ టెంపో కొనసాగిస్తూ ట్రయిలర్ కట్ చేశారు. ఇంతకుముందు టీజర్లు చూసిన వారికి కొత్తగా చూస్తున్నామన్న ఫీల్ ఏమీ రాదు.

ఈ ట్రయిలర్ లో బాగా ఆకట్టుకుంది ఏమన్నా ఉందంటే మ్యూజిక్ డైరెక్టర్ రవిశంకర్ ఇచ్చిన బ్యాక్ గ్రౌండ్ స్కోర్. కాకపోతే ఆర్జీవీ సినిమాలకు ఉండే సీరియస్ స్టయిల్ లో కాకుండా ఫక్తు కమర్షియల్ సినిమాలకు ఉండే విధంగా ఈ బ్యాక్ గ్రౌండ్ స్కోర్ సాగుతుంది. కంపెనీ ప్రొడక్షన్స్ బ్యానర్ పై రామ్ గోపాల్ వర్మ - సుధీర్ చంద్ర సంయుక్తంగా ఈ సినిమాని నిర్మించారు. ఈ మూవీతో మైరా సరీన్ హీరోయిన్ గా టాలీవుడ్ కు పరిచయం కానుంది